ന്യൂഡൽഹി: മധ്യപ്രദേശിലെ ഖജുരാഹോയിലുള്ള ജാവരി ക്ഷേത്രത്തിലെ കേടുപാടുകൾ സംഭവിച്ച വിഷ്ണു വിഗ്രഹം മാറ്റി സ്ഥാപിക്കണമെന്ന ഹർജി സുപ്രീം കോടതി തള്ളി. പൊതുതാൽപര്യ ഹർജിയായതിനാൽ ഇത് നിലനിൽക്കില്ലെന്ന് ചൂണ്ടിക്കാട്ടിയാണ് കോടതി നടപടി.
തലയറ്റ നിലയിലുള്ള ഏഴ് അടി ഉയരമുള്ള വിഷ്ണു വിഗ്രഹത്തിന് പകരം പുതിയ വിഗ്രഹം സ്ഥാപിക്കണമെന്നായിരുന്നു ഹർജിയിലെ ആവശ്യം.
രാകേഷ് ദലാൽ എന്നയാളാണ് ഹർജി സമർപ്പിച്ചത്. എന്നാൽ, ഖജുരാഹോ ക്ഷേത്രങ്ങളുടെ സംരക്ഷണം ആർക്കിയോളജിക്കൽ സർവേ ഓഫ് ഇന്ത്യയുടെ (എ.എസ്.ഐ) ചുമതലയാണെന്നും, വിഗ്രഹം മാറ്റി സ്ഥാപിക്കുന്നത് പുരാവസ്തു സംരക്ഷണ നിയമങ്ങൾക്ക് എതിരാണെന്നും എ.എസ്.ഐ കോടതിയെ അറിയിച്ചു.
കൂടാതെ, ഖജുരാഹോ ഒരു വിനോദസഞ്ചാര കേന്ദ്രമാണോ അതോ തീർത്ഥാടന കേന്ദ്രമാണോ എന്നത് എ.എസ്.ഐയുടെ പരിധിയിൽ വരുന്ന വിഷയമല്ലെന്നും അധികൃതർ വ്യക്തമാക്കി. ഈ വാദങ്ങൾ പരിഗണിച്ചാണ് കോടതി ഹർജി തള്ളിയത്.
