ന്യൂഡൽഹി: ഒരു പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്ത ശേഷം കൊലപ്പെടുത്തിയ കേസിൽ രണ്ട് പ്രതികളുടെ ശിക്ഷ റദ്ദാക്കി സുപ്രീം കോടതി. യുപിയിൽ നടന്ന ഈ കേസിൽ അന്വേഷണത്തിലും വിചാരണയിലും ഗുരുതരമായ പിഴവുകൾ സംഭവിച്ചതായി ചൂണ്ടിക്കാട്ടിയാണ് കോടതിയുടെ നടപടി.
ജസ്റ്റിസുമാരായ വിക്രം നാഥ്, സഞ്ജയ് കരോൾ, സന്ദീപ് മേത്ത എന്നിവരടങ്ങിയ മൂന്നംഗ ബെഞ്ചാണ് വിധി പുറപ്പെടുവിച്ചത്. സാഹചര്യത്തെളിവുകളെ മാത്രം ആശ്രയിച്ചുള്ള ഈ കേസിൽ പ്രതികളുടെ കുറ്റം തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് കോടതി വ്യക്തമാക്കി. അന്വേഷണം "അലസവും നിലവാരമില്ലാത്തതും" എന്നും വിചാരണ "സംക്ഷിപ്തവും" എന്നും വിശേഷിപ്പിച്ച കോടതി, കുട്ടികൾക്കെതിരായ ഗുരുതരമായ കുറ്റകൃത്യങ്ങളിൽ പോലും നീതി നടപ്പാക്കുന്നതിൽ ഇത്തരം വീഴ്ചകൾ വിഘാതമാകുമെന്നും നിരീക്ഷിച്ചു.
ഫോറൻസിക് തെളിവുകളിലെ പാളിച്ചകൾ കോടതി പ്രത്യേകം എടുത്തുപറഞ്ഞു. പ്രധാന തെളിവായി പരിഗണിച്ച ഡിഎൻഎ റിപ്പോർട്ട് ശാസ്ത്രജ്ഞന്റെ മൊഴിയില്ലാതെ അഫിഡവിറ്റ് വഴി ഹാജരാക്കുകയായിരുന്നു. ഈ റിപ്പോർട്ട് പ്രതികളെ ചോദ്യം ചെയ്യുമ്പോൾ പരിഗണിച്ചിരുന്നില്ലെന്നും കോടതി ചൂണ്ടിക്കാട്ടി.
ജസ്റ്റിസ് സന്ദീപ് മേത്ത വിധിന്യായത്തിൽ ഇങ്ങനെ പറഞ്ഞു: “പ്രതികളിൽ നിന്ന് രക്തസാമ്പിളുകൾ ശേഖരിച്ചതുമായി ബന്ധപ്പെട്ട ഒരു രേഖയും ഹാജരാക്കുകയോ തെളിവായി പരിഗണിക്കുകയോ ചെയ്തില്ല. അതുകൊണ്ടുതന്നെ ഡിഎൻഎ റിപ്പോർട്ടുകൾ ഒരു കടലാസ് കഷണത്തിന് തുല്യമാണ്.”
കൂടാതെ, ഫോറൻസിക് സാമ്പിളുകളുടെ കൈമാറ്റത്തിൽ ശരിയായ നടപടിക്രമങ്ങൾ പാലിച്ചിട്ടില്ലെന്നും ഇത് തെളിവിന്റെ വിശ്വാസ്യതയെ ബാധിക്കുമെന്നും കോടതി വിലയിരുത്തി. കേസിൽ പ്രോസിക്യൂഷൻ ഹാജരാക്കിയ ഡിഎൻഎ റിപ്പോർട്ടുകൾ അതിനാൽത്തന്നെ വിശ്വസനീയമല്ലെന്നും കോടതി വ്യക്തമാക്കി.
ഗുരുതരമായ കുറ്റകൃത്യങ്ങളിൽ പോലും, കൃത്യമായ അന്വേഷണമോ സ്വീകാര്യമായ തെളിവുകളോ ഇല്ലാതെ ശിക്ഷിക്കാനാവില്ലെന്ന നിയമപരമായ തത്വം ഈ വിധി അടിവരയിടുന്നു. നിയമപരമായ നടപടികൾ പാലിക്കേണ്ടതിന്റെ ആവശ്യകതയാണ് സുപ്രീം കോടതിയുടെ ഈ വിധി ഓർമ്മിപ്പിക്കുന്നത്.
