റിയാദ്/ദോഹ : മേഖലയിലെ നിലവിലെ രാഷ്ട്രീയ സാഹചര്യങ്ങൾ വിതരണ ശൃംഖലയെ (Supply Chains) എങ്ങനെയൊക്കെ ബാധിക്കുന്നു എന്ന് വിലയിരുത്താൻ ജി.സി.സി ഗതാഗത-വാർത്താവിനിമയ മന്ത്രിമാരുടെ അടിയന്തര യോഗം ചേർന്നു. വീഡിയോ കോൺഫറൻസിംഗ് വഴി നടന്ന യോഗത്തിൽ ഖത്തറിനെ പ്രതിനിധീകരിച്ച് ഗതാഗത മന്ത്രി ഷെയ്ഖ് മുഹമ്മദ് ബിൻ അബ്ദുള്ള ബിൻ മുഹമ്മദ് അൽ താനി പങ്കെടുത്തു.ഇറാൻ്റെ ഭാഗത്തുനിന്നുണ്ടാകുന്ന സൈനിക നീക്കങ്ങൾ വിതരണ ശൃംഖലയെ ബാധിക്കാതിരിക്കാൻ ബദൽ തുറമുഖങ്ങളും സുരക്ഷിതമായ ഗതാഗത പാതകളും ഉപയോഗപ്പെടുത്തുന്നതിനെക്കുറിച്ച് യോഗം ചർച്ച ചെയ്തു.അതിർത്തി കടന്നുള്ള ചരക്ക് നീക്കം സുഗമമാക്കുന്നതിന് 'ഗ്രീൻ ലെയിൻസ് പ്രോട്ടോക്കോൾ' (Green Lanes Protocol) സജീവമാക്കാൻ നിർദ്ദേശമുയർന്നു. ഇത് അത്യാവശ്യ സാധനങ്ങളുടെ നീക്കം തടസ്സമില്ലാതെ ഉറപ്പാക്കും.ഗതാഗത-വാർത്താവിനിമയ മേഖല ജി.സി.സി രാജ്യങ്ങളുടെ സാമ്പത്തിക സുരക്ഷയുടെ ആധാരശിലയാണെന്ന് ജി.സി.സി സെക്രട്ടറി ജനറൽ ജാസെം മുഹമ്മദ് അൽബുദൈവി പറഞ്ഞു. ഭക്ഷണം, മരുന്ന്, ഇന്ധനം തുടങ്ങിയ തന്ത്രപ്രധാനമായ ഉൽപ്പന്നങ്ങളുടെ ഒഴുക്ക് നിലയ്ക്കാതെ നോക്കേണ്ടത് അനിവാര്യമാണെന്ന് അദ്ദേഹം കൂട്ടിച്ചേർത്തു.
തത്സമയ വിവരങ്ങൾ കൈമാറുന്നതിനും ഗതാഗത തടസ്സങ്ങൾ ഉടനടി പരിഹരിക്കുന്നതിനുമായി ഒരു സംയുക്ത ഏകോപന സംവിധാനം വികസിപ്പിക്കും. പ്രതിസന്ധി തുടങ്ങിയ ശേഷം ഇത് മുപ്പത്തിയഞ്ചാമത്തെ ഏകോപന യോഗമാണ് നടക്കുന്നത് എന്നത് രാജ്യങ്ങളുടെ തയ്യാറെടുപ്പിനെ സൂചിപ്പിക്കുന്നു.
​മേഖലയിലെ വെല്ലുവിളികളെ ഒത്തൊരുമയോടെ നേരിടാനും വിപണികളിലെ സുസ്ഥിരത ഉറപ്പാക്കാനും ജി.സി.സി രാജ്യങ്ങൾ പ്രതിജ്ഞാബദ്ധമാണെന്ന് യോഗം വിലയിരുത്തി.