തിരുവനന്തപുരം:മുതിർന്ന സി.പി.എം നേതാവ് ജി. സുധാകരന്റെ അനുമതിയില്ലാതെ അദ്ദേഹത്തിന്റെ ഫേസ്ബുക്ക് പേജിൽ പാർട്ടി സോഷ്യൽ മീഡിയ വിഭാഗം നൽകിയ ലൈവ് വീഡിയോ കുടുംബം ഇടപെട്ട് നീക്കം ചെയ്തു. പാർട്ടിയുമായി വീണ്ടും രമ്യതയിലാകാൻ താൽപ്പര്യമില്ലെന്ന് സുധാകരൻ ആവർത്തിക്കുന്നതിനിടെയാണ്, മുഖ്യമന്ത്രി പങ്കെടുത്ത പെരുമ്പളം പാലം ഉദ്ഘാടനത്തിന്റെ വീഡിയോ അദ്ദേഹത്തിന്റെ പേജിൽ പ്രത്യക്ഷപ്പെട്ടത്. ഇത് ശ്രദ്ധയിൽപ്പെട്ട ഉടൻ തന്നെ സുധാകരന്റെ കുടുംബം വീഡിയോ നീക്കം ചെയ്യാൻ ആവശ്യപ്പെടുകയായിരുന്നു.
​ഇതാദ്യമായല്ല സുധാകരന്റെ പേജിൽ അനുമതിയില്ലാതെ ഇത്തരം പോസ്റ്റുകൾ വരുന്നത്. കഴിഞ്ഞ വർഷത്തെ പുന്നപ്ര-വയലാർ വാർഷികാചരണത്തിന്റെ വീഡിയോ വന്നപ്പോഴും കുടുംബം സമാനമായ നിലപാട് സ്വീകരിച്ചിരുന്നു. തന്റെ അക്കൗണ്ട് ലൈവ് ഗ്രൂപ്പിൽ നിന്ന് നീക്കം ചെയ്യണമെന്ന് സുധാകരൻ പലതവണ ആവശ്യപ്പെട്ടിട്ടും നടപടിയുണ്ടായില്ല. തന്റെ കൂടി പരിശ്രമഫലമായി ആരംഭിച്ച പെരുമ്പളം പാലത്തിന്റെ ഉദ്ഘാടന ചടങ്ങിൽ അദ്ദേഹം പങ്കെടുക്കുമോ എന്ന ആകാംക്ഷ നിലനിൽക്കെയാണ് ഫേസ്ബുക്കിൽ ലൈവ് വന്നത്. ഇതോടെ സുധാകരൻ പാർട്ടി നിലപാടുകളോട് അടുക്കുന്നു എന്ന രീതിയിലുള്ള പ്രചാരണങ്ങളും ശക്തമായിരുന്നു.
​മുഖ്യമന്ത്രി പിണറായി വിജയൻ ഹെലികോപ്റ്ററിൽ വന്നിറങ്ങിയത് സുധാകരന്റെ വീടിന് അടുത്തുള്ള പുന്നപ്ര എൻജിനീയറിംഗ് കോളേജ് ഗ്രൗണ്ടിലായിരുന്നു. മുഖ്യമന്ത്രി സുധാകരനെ സന്ദർശിക്കുമെന്ന അഭ്യൂഹത്തെത്തുടർന്ന് സുധാകരന്റെ വീടിന് സമീപം പോലീസ് കാവൽ ഏർപ്പെടുത്തിയിരുന്നെങ്കിലും, മുഖ്യമന്ത്രി നേരെ പാർട്ടി ജില്ലാ കമ്മിറ്റി ഓഫീസിലേക്കാണ് പോയത്.
​അതേസമയം, മുൻ മുഖ്യമന്ത്രി വി.എസ്. അച്യുതാനന്ദൻ പഠിച്ച പറവൂർ ഗവ. ഹയർ സെക്കൻഡറി സ്കൂളിനെ 'വി.എസ്. അച്യുതാനന്ദൻ സ്മാരക ഗവ. ഹയർ സെക്കൻഡറി സ്കൂൾ' എന്ന് പുനർനാമകരണം ചെയ്ത സർക്കാർ നടപടിയെ ജി. സുധാകരൻ സ്വാഗതം ചെയ്തു. തന്റെ കത്ത് പരിഗണിച്ച് നടപടിയെടുത്ത വിദ്യാഭ്യാസ മന്ത്രി വി. ശിവൻകുട്ടിയെ അദ്ദേഹം ഫേസ്ബുക്ക് പോസ്റ്റിലൂടെ അഭിനന്ദിച്ചു.