ദോഹ: സ്വകാര്യ സ്കൂളുകളിൽ ട്യൂഷൻ ഫീസ് അടയ്ക്കാൻ വൈകിയാലും അധ്യയന വർഷം പൂർത്തിയാക്കാൻ വിദ്യാർത്ഥികൾക്ക് അവകാശമുണ്ടെന്ന് ഖത്തർ വിദ്യാഭ്യാസ, ഉന്നത വിദ്യാഭ്യാസ മന്ത്രി ലുൽവ ബിന്ത് റാഷിദ് ബിൻ മുഹമ്മദ് അൽ ഖാതർ വ്യക്തമാക്കി. മാതാപിതാക്കളും സ്കൂളും തമ്മിലുള്ള സാമ്പത്തിക തർക്കങ്ങളിൽ വിദ്യാർത്ഥികളുടെ പഠനം തടസ്സപ്പെടരുതെന്ന് മന്ത്രി ഓർമ്മിപ്പിച്ചു.
​സോഷ്യൽ മീഡിയ പ്ലാറ്റ്‌ഫോമായ 'എക്സി'ൽ (X) ഒരു രക്ഷിതാവിന്റെ പോസ്റ്റിന് മറുപടിയായാണ് മന്ത്രി ഇക്കാര്യം വ്യക്തമാക്കിയത്. വിദ്യാഭ്യാസവും സാമ്പത്തിക ഇടപാടുകളും തമ്മിലുള്ള ഈ വേർതിരിവിനെ 'ബോധപൂർവ്വമായ വേർതിരിവ്' (Conscious Separation) എന്ന് രക്ഷിതാവ് പ്രശംസിച്ചിരുന്നു.ഖത്തർ നിയമപ്രകാരം ഓരോ വിദ്യാർത്ഥിക്കുമുള്ള വിദ്യാഭ്യാസ അവകാശം സംരക്ഷിക്കപ്പെടണം. ഫീസ് കുടിശ്ശികയുടെ പേരിൽ കുട്ടിയെ പഠനത്തിൽ നിന്ന് വിലക്കാൻ പാടില്ല.സ്കൂൾ ഫീസ് ലഭിക്കുന്നതിനായി സ്കൂളുകൾക്ക് രക്ഷിതാക്കൾക്കെതിരെ നിയമപരമായ മാർഗ്ഗങ്ങൾ തേടാം. എന്നാൽ ഇത് കുട്ടിയുടെ അക്കാദമിക് വർഷത്തെ ബാധിക്കരുത്.ഫീസ് അടയ്ക്കുന്നതിൽ വീഴ്ച വരുത്തിയാൽ നിലവിലെ അധ്യയന വർഷം പൂർത്തിയാക്കാൻ അനുവദിക്കണം. എന്നാൽ തുടർന്ന് മറ്റൊരു സ്കൂളിലേക്ക് മാറേണ്ടി വന്നേക്കാം.
​പല സ്കൂളുകളും ഈ നിയമം ലംഘിക്കുന്നതായി പരാതികൾ ലഭിക്കുന്നുണ്ടെന്നും, രക്ഷിതാക്കൾ ഈ അവകാശത്തെക്കുറിച്ച് ബോധവാന്മാരാകണമെന്നും മന്ത്രി പറഞ്ഞു. ഫീസ് അടച്ചില്ലെങ്കിൽ വിദ്യാർത്ഥിക്ക് പഠനം തുടരാനാവില്ലെന്ന് ചില സ്കൂളുകൾ തെറ്റായ ധാരണ നൽകുന്നുണ്ടെന്ന് രക്ഷിതാക്കൾ ചൂണ്ടിക്കാട്ടിയതിനെ തുടർന്നാണ് മന്ത്രിയുടെ ഈ ഇടപെടൽ.