ദോഹ: കുട്ടികളുടെ ഡിജിറ്റൽ സുരക്ഷ ഉറപ്പാക്കുന്നതിനായുള്ള പുതിയ നിയമനിർമ്മാണ നിർദ്ദേശം ശൂറാ കൗൺസിലിന്റെ ഹെൽത്ത്, ജനറൽ സർവീസസ് ആൻഡ് എൻവയോൺമെന്റ് കമ്മിറ്റി ചർച്ച ചെയ്തു. ചൊവ്വാഴ്ച ശൂറാ കൗൺസിൽ സ്പീക്കർ ഹസ്സൻ ബിൻ അബ്ദുള്ള അൽ ഗാനിമിന്റെ അധ്യക്ഷതയിലായിരുന്നു യോഗം. വിശദമായ പഠനത്തിനായി കൗൺസിൽ ഈ വിഷയം കമ്മിറ്റിയുടെ പരിഗണനയ്ക്ക് വിടുകയായിരുന്നു.
ആധുനിക സാങ്കേതികവിദ്യകളുടെയും ഡിജിറ്റൽ പ്ലാറ്റ്‌ഫോമുകളുടെയും സുരക്ഷിതമായ ഉപയോഗം പ്രോത്സാഹിപ്പിക്കുന്നതിനുള്ള സംവിധാനങ്ങൾ യോഗത്തിൽ ചർച്ചയായി. സൈബർ ലോകത്ത് കുട്ടികൾ നേരിടുന്ന വെല്ലുവിളികളും അവരെ സംരക്ഷിക്കുന്നതിനുള്ള നിയമപരവും നിയന്ത്രണപരവുമായ വശങ്ങളും അംഗങ്ങൾ വിലയിരുത്തി.
ഇതുമായി ബന്ധപ്പെട്ട് ഉയർന്നുവന്ന വിവിധ നിർദ്ദേശങ്ങളും നിരീക്ഷണങ്ങളും വിശദമായി പരിശോധിച്ച കമ്മിറ്റി, അടുത്ത യോഗത്തിലും വിഷയം തുടർന്ന് പഠിക്കാനും ആവശ്യമായ ക്രമീകരണങ്ങൾ പൂർത്തിയാക്കാനും തീരുമാനിച്ചു.
