ദോഹ: അന്തരിച്ച ഫാദർ അമീർ ശൈഖ് ഹമദ് ബിൻ ഖലീഫ അൽഥാനിയുടെ ഭരണപരമായ ദീർഘവീക്ഷണങ്ങളെയും വിപ്ലവകരമായ തീരുമാനങ്ങളെയും ഓർമ്മിപ്പിച്ചുകൊണ്ട് മകൾ ശൈഖ അൽ മയാസ ബിന്ത് ഹമദ് അൽഥാനി എഴുതിയ അനുസ്മരണക്കുറിപ്പ് ശ്രദ്ധേയമാകുന്നു. 'അൽ ജസീറ' മാധ്യമ ശൃംഖലയിൽ പ്രസിദ്ധീകരിച്ച ലേഖനത്തിൽ, ഖത്തറിന്റെ ആധുനിക നവോത്ഥാനത്തിന് പിന്നിലെ പിതാവിന്റെ നിശ്ചയദാർഢ്യത്തെക്കുറിച്ചാണ് ശൈഖ അൽ മയാസ വിശദീകരിക്കുന്നത്.
​വ്യക്തിപരമായ നേട്ടങ്ങൾക്കോ പദവികൾക്കോ വേണ്ടിയാകരുത്, മറിച്ച് ചെയ്യുന്നതെന്തും രാജ്യത്തിന്റെ പുരോഗതിക്ക് വേണ്ടിയായിരിക്കണം എന്നർത്ഥം വരുന്ന "മക്യാസ് ഖത്തർ (The measure is Qatar)" എന്ന പിതാവിന്റെ ആപ്തവാക്യമാണ് തന്റെ ജീവിതത്തിന്റെ വഴികാട്ടിയെന്ന് അവർ കുറിച്ചു.അധികാര കൈമാറ്റത്തിൽ പിതാവ് കാണിച്ച അസാധാരണമായ മാതൃകയെ ലേഖനത്തിൽ ശൈഖ അൽ മയാസ എടുത്തുപറയുന്നുണ്ട്. രാജ്യത്തെ ദാരിദ്ര്യത്തിൽ നിന്ന് ആഗോള സാമ്പത്തിക ശക്തിയായി ഉയർത്തിയ ശേഷം, കൃത്യമായ സമയത്ത് യുവനേതൃത്വത്തെ ഭരണമേൽപ്പിക്കാൻ അദ്ദേഹം തയ്യാറായി. തന്റെ ദൗത്യം പൂർത്തിയായെന്ന ബോധ്യത്തോടെ മകനായ അമീർ ശൈഖ് തമീം ബിൻ ഹമദ് അൽഥാനിയെ അധികാരം ഏൽപ്പിച്ച തീരുമാനം മേഖലയുടെ ചരിത്രത്തിൽ തന്നെ സമാനതകളില്ലാത്തതാണെന്ന് അവർ ചൂണ്ടിക്കാട്ടി. അറബ് ലോകത്തെ പ്രതിഭകൾക്ക് തങ്ങളുടെ സ്വത്വത്തിൽ അഭിമാനം തോന്നിയ ഇടമായി ഖത്തറിനെ മാറ്റിയെടുത്തത് അദ്ദേഹത്തിന്റെ ദീർഘവീക്ഷണമാണ്.സെൻസർഷിപ്പ് പൂർണ്ണമായും നിർത്തലാക്കിക്കൊണ്ട് 'അൽ ജസീറ' സ്ഥാപിച്ചതാണ് പിതാവിന്റെ ഏറ്റവും അഭിമാനകരമായ നേട്ടമായി അവർ വിലയിരുത്തുന്നത്. മാധ്യമങ്ങൾ, വിദ്യാഭ്യാസം, സംസ്‌കാരം, കായികം എന്നീ മേഖലകളിലൂടെ അറബ് ജനതയുടെ ശബ്ദത്തിന് അന്തസ്സും ആഗോള അംഗീകാരവും നൽകാൻ അദ്ദേഹം ആഗ്രഹിച്ചു. ഭിന്നാഭിപ്രായങ്ങളെ തർക്കങ്ങളായല്ല, മറിച്ച് ചർച്ചകളിലൂടെ മികച്ച പരിഹാരങ്ങൾ കണ്ടെത്താനുള്ള മാർഗ്ഗമായാണ് അദ്ദേഹം കണ്ടിരുന്നത്.
​സാംസ്‌കാരിക മേഖലയെ രാജ്യത്തിന്റെ സാമൂഹിക-സാമ്പത്തിക വളർച്ചയുടെ ചാലകശക്തിയായാണ് ഫാദർ അമീർ കണ്ടത്. മക്കളെപ്പോലെ തന്നെ പെൺമക്കളെയും തുല്യമായി ശാക്തീകരിക്കുന്നതിൽ അദ്ദേഹം ശ്രദ്ധിച്ചിരുന്നു. കേവലം 23-ാം വയസ്സിൽ മ്യൂസിയം ഓഫ് ഇസ്ലാമിക് ആർട്ടിന്റെ (MIA) ചുമതല ഏൽപ്പിച്ചുകൊണ്ട് തന്നിലെ കഴിവുകളെ അദ്ദേഹം എങ്ങനെയാണ് പ്രോത്സാഹിപ്പിച്ചതെന്നും ശൈഖ അൽ മയാസ അനുസ്മരിച്ചു.
വലിയൊരു ദർശകനായ നേതാവായിരിക്കുമ്പോൾ തന്നെ, വൈകുന്നേരങ്ങളിൽ നഗരപ്രദേശങ്ങളിൽ സ്വയം വാഹനം ഓടിച്ചുപോയി സാധാരണക്കാരായ ജനങ്ങളുടെ സുഖവിവരങ്ങൾ അന്വേഷിക്കുന്ന ഒരു ജനകീയ പിതാവായിരുന്നു അദ്ദേഹം. വീട്ടിൽ കടുത്ത അച്ചടക്കവും സമയനിഷ്ഠയും പുലർത്തിയ അദ്ദേഹം, രാഷ്ട്രീയ ചിന്തകരും കലാകാരന്മാരുമായി നിരന്തരം സംവദിച്ചിരുന്നു.
​മരണം ശരീരത്തെ ഇല്ലാതാക്കുമ്പോഴും അദ്ദേഹം അവശേഷിപ്പിച്ച സ്നേഹവും പൈതൃകവും രാജ്യത്തെ ജനങ്ങളെ ഒന്നിപ്പിച്ചു നിർത്തുകയാണെന്നും, ആ ദർശനങ്ങൾ മുൻനിർത്തി കൂടുതൽ കഠിനാധ്വാനം ചെയ്യുകയാണ് അദ്ദേഹത്തോടുള്ള യഥാർത്ഥ ആദരവെന്നും പറഞ്ഞുകൊണ്ടാണ് ശൈഖ അൽ മയാസ ലേഖനം അവസാനിപ്പിക്കുന്നത്.