തിരുവനന്തപുരം: നിയമസഭാ തിരഞ്ഞെടുപ്പിനുള്ള കോൺഗ്രസ് സ്ഥാനാർത്ഥികളുടെ ആദ്യഘട്ട പട്ടികയ്ക്ക് അംഗീകാരം നൽകുന്നതിനായി നിർണ്ണായക കേന്ദ്ര തിരഞ്ഞെടുപ്പ് കമ്മിറ്റി യോഗം നാളെ ഡൽഹിയിൽ ചേരും. തർക്കങ്ങളില്ലാത്ത സീറ്റുകളിലും സിറ്റിംഗ് എം.എൽ.എമാർ മത്സരിക്കുന്ന മണ്ഡലങ്ങളിലും വ്യക്തത വരുത്തിയുള്ള പട്ടികയാകും നാളെ പുറത്തുവിടുക.
ഹൈക്കമാൻഡുമായുള്ള ചർച്ചകൾക്കായി കെ.പി.സി.സി പ്രസിഡന്റ് സണ്ണി ജോസഫും പ്രതിപക്ഷ നേതാവ് വി.ഡി. സതീശനും ഇന്ന് രാത്രി തന്നെ ഡൽഹിക്ക് തിരിക്കും. എ.ഐ.സി.സി സ്ക്രീനിംഗ് കമ്മിറ്റി അദ്ധ്യക്ഷൻ മധുസൂദൻ മിസ്ത്രി, ജനറൽ സെക്രട്ടറി ദീപാദാസ് മുൻഷി എന്നിവരുമായി സംസ്ഥാന നേതാക്കൾ ഇതിനോടകം പ്രാഥമിക ചർച്ചകൾ പൂർത്തിയാക്കിയിട്ടുണ്ട്. ശനിയാഴ്ച രാഹുൽ ഗാന്ധിയുമായും നേതാക്കൾ കൂടിക്കാഴ്ച നടത്തിയിരുന്നു.
യു.ഡി.എഫിൽ സീറ്റ് തർക്കം മുറുകുന്നു
സ്ഥാനാർത്ഥി നിർണ്ണയം ഒരുവശത്ത് നടക്കുമ്പോഴും യു.ഡി.എഫിലെ സീറ്റ് വിഭജനം ഇപ്പോഴും കീറാമുട്ടിയായി തുടരുകയാണ്. മുസ്ലീം ലീഗുമായി മാത്രമാണ് ഇതുവരെ ധാരണയിലെത്താൻ സാധിച്ചത്. മറ്റു ഘടകകക്ഷികളുമായുള്ള ചർച്ചകൾ വഴിമുട്ടി നിൽക്കുകയാണ്.
ആർ.എസ്.പി: നാല് സീറ്റുകളിൽ ധാരണയായെങ്കിലും ഇരവിപുരത്ത് പ്രഖ്യാപിച്ച വിഷ്ണു മോഹനെതിരെ പ്രാദേശിക കോൺഗ്രസ് നേതൃത്വം രംഗത്തെത്തിയിട്ടുണ്ട്. മണ്ഡലം തിരിച്ചുപിടിക്കാൻ കോൺഗ്രസ് തന്നെ മത്സരിക്കണമെന്നാണ് ഭാരവാഹികളുടെ ആവശ്യം.
കേരള കോൺഗ്രസ് (ജോസഫ്): പത്ത് സീറ്റുകൾ എട്ടായി കുറച്ചതിലും ഇടുക്കി, കുട്ടനാട് സീറ്റുകൾ വിട്ടുനൽകേണ്ടി വരുന്നതിലും ജോസഫ് വിഭാഗം കടുത്ത അതൃപ്തിയിലാണ്. പ്രത്യേകിച്ചും കുട്ടനാട് സീറ്റ് വിട്ടുകൊടുക്കില്ലെന്ന ഉറച്ച നിലപാടിലാണവർ.
ഫോർവേഡ് ബ്ലോക്ക്: കൊല്ലം സീറ്റിനായി ഫോർവേഡ് ബ്ലോക്ക് പിടിമുറുക്കുന്നുണ്ടെങ്കിലും വിട്ടുകൊടുക്കാൻ കോൺഗ്രസ് തയ്യാറല്ല. വൈപ്പിൻ, കായംകുളം, അരുവിക്കര, മലമ്പുഴ എന്നിവയിലൊന്ന് കൂടി വേണമെന്ന ആവശ്യവും അവർ മുന്നോട്ടുവെച്ചിട്ടുണ്ട്.
സി.എം.പി, കേരള കോൺഗ്രസ് (ജേക്കബ്) വിഭാഗങ്ങളെ ഓരോ സീറ്റിൽ ഒതുക്കാൻ കോൺഗ്രസിന് സാധിച്ചിട്ടുണ്ടെങ്കിലും മറ്റ് പ്രധാന കക്ഷികളെ അനുനയിപ്പിക്കുന്നത് വരും ദിവസങ്ങളിൽ വലിയ വെല്ലുവിളിയാകും.
