ലണ്ടൻ: ലണ്ടനിലെ അത്യന്തം തിരക്കേറിയ മെയ്ഫെയർ പ്രവിശ്യയിൽ സൗദി അറേബ്യൻ പൗരന് നേരെ കവർച്ചാ ശ്രമവും ആക്രമണവും. കയ്യിലുണ്ടായിരുന്ന വിലപിടിപ്പുള്ള ആഡംബര വാച്ച് തട്ടിയെടുക്കാനുള്ള ശ്രമത്തിനിടയിലാണ് ഇദ്ദേഹത്തിന് കുത്തേറ്റത്.
സംഭവസ്ഥലത്തു വെച്ചുതന്നെ 58 വയസ്സുകാരനായ പ്രതിയെ ലണ്ടൻ മെട്രോപൊളിറ്റൻ പോലീസ് കസ്റ്റഡിയിലെടുത്തു. ഗുരുതരമായ പരിക്കേൽപ്പിക്കൽ, മാരകായുധം കൈവശം വെക്കൽ, കവർച്ചാ ശ്രമം എന്നീ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്.
ആക്രമണത്തിൽ പരിക്കേറ്റ സൗദി പൗരനെ ഉടൻ തന്നെ ആശുപത്രിയിൽ പ്രവേശിപ്പിച്ചു. ഇദ്ദേഹത്തിന്റെ പരിക്ക് ജീവന് ഭീഷണിയല്ലെന്ന് പോലീസ് അറിയിച്ചു.
യുകെയിലെ സൗദി എംബസി വിഷയം നേരിട്ട് നിരീക്ഷിച്ചുവരികയാണ്. പൗരന് ആവശ്യമായ ചികിത്സയും പിന്തുണയും ഉറപ്പാക്കുന്നുണ്ടെന്നും, സംഭവത്തെക്കുറിച്ച് അടിയന്തര അന്വേഷണം നടത്തി കുറ്റവാളിക്ക് അർഹമായ ശിക്ഷ ഉറപ്പാക്കണമെന്നും എംബസി ആവശ്യപ്പെട്ടു. പൊതുസ്ഥലങ്ങളിലൂടെ സഞ്ചരിക്കുമ്പോൾ വിലപിടിപ്പുള്ള വസ്തുക്കളും ആഡംബര ആഭരണങ്ങളും പ്രദർശിപ്പിക്കുന്നത് ഒഴിവാക്കണമെന്നും ജാഗ്രത പാലിക്കണമെന്നും എംബസി സൗദി പൗരന്മാർക്ക് നിർദ്ദേശം നൽകി.
സംഭവം ഒറ്റപ്പെട്ടതാണെന്നും പൊതുജനങ്ങൾക്ക് നിലവിൽ മറ്റ് സുരക്ഷാ ഭീഷണികളില്ലെന്നും മെട്രോപൊളിറ്റൻ പോലീസ് കൂട്ടിച്ചേർത്തു.
