ചേർത്തല :കേരള രാഷ്ട്രീയത്തിൽ പുതിയൊരു വാദപ്രതിവാദത്തിന് തിരികൊളുത്തിയിരിക്കുകയാണ് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന്റെ .ഏറ്റവും പുതിയ വെളിപ്പെടുത്തലുകൾ. ഏഷ്യാനെറ്റ് ന്യൂസ് അസിസ്റ്റന്റ് എക്സിക്യൂട്ടീവ് എഡിറ്റർ പി.ജി. സുരേഷ് കുമാറുമായി നടത്തിയ പ്രത്യേക അഭിമുഖത്തിൽ, പ്രതിപക്ഷ നേതാവ് വി.ഡി. സതീശനെതിരെയും യു.ഡി.എഫിന്റെ ഭാവി സാധ്യതകളെക്കുറിച്ചും അതിരൂക്ഷമായ വിമർശനങ്ങളാണ് അദ്ദേഹം അഴിച്ചുവിട്ടത്. സതീശനെ വെറുമൊരു 'പ്രസംഗ തൊഴിലാളി' എന്ന് വിശേഷിപ്പിച്ച വെള്ളാപ്പള്ളി, കേരള രാഷ്ട്രീയത്തിലെ 'ബഫൂൺ' എന്നും 'ജോക്കർ' എന്നും വിളിച്ച് ആക്ഷേപിക്കാനും മടിച്ചില്ല. നേതൃഗുണമില്ലാത്ത ഒരാളായി സതീശനെ ചിത്രീകരിക്കുമ്പോഴും, യു.ഡി.എഫിൽ മുഖ്യമന്ത്രി സ്ഥാനത്തേക്ക് ഏറ്റവും അനുയോജ്യനായ വ്യക്തി രമേശ് ചെന്നിത്തലയാണെന്ന നിലപാടാണ് അദ്ദേഹം സ്വീകരിച്ചത്. ചെന്നിത്തലയെ ഒരു 'മിതവാദി'യായി ഉയർത്തിക്കാട്ടിയ വെള്ളാപ്പള്ളി, കോൺഗ്രസിനുള്ളിലെ നേതൃത്വപരമായ മുൻഗണനകളെക്കുറിച്ചുള്ള ചർച്ചകൾക്ക് വീണ്ടും ചൂടുപിടിപ്പിച്ചിരിക്കുകയാണ്.
യു.ഡി.എഫിന്റെ തിരഞ്ഞെടുപ്പ് സാധ്യതകളെ പരിഹാസത്തോടെ തള്ളിക്കളഞ്ഞ വെള്ളാപ്പള്ളി, മുന്നണിക്ക് നൂറു സീറ്റ് കിട്ടുക എന്നത് ലോകാവസാനം പോലെ അസംഭവ്യമാണെന്ന് തുറന്നടിച്ചു. കെ. സുധാകരൻ ഉൾപ്പെടെയുള്ള നേതാക്കൾക്കിടയിലെ ആഭ്യന്തര ഭിന്നതകളെ ചൂണ്ടിക്കാട്ടിയ അദ്ദേഹം, എൽ.ഡി.എഫിന് തുടർഭരണം ഉറപ്പാണെന്ന പ്രവചനവും ആവർത്തിച്ചു. എന്നാൽ ഈ പ്രസ്താവനകൾ കേവലം രാഷ്ട്രീയ വിമർശനങ്ങൾക്കപ്പുറം കൃത്യമായ സമുദായ സമവാക്യങ്ങളെ ലക്ഷ്യം വെച്ചുള്ളതാണെന്നാണ് വിലയിരുത്തപ്പെടുന്നത്. പ്രത്യേകിച്ചും വി.ഡി. സതീശന്റെ സ്വന്തം മണ്ഡലമായ പറവൂരിൽ ഈഴവ വോട്ടുകളുടെ നിർണ്ണായക സ്വാധീനം നിലനിൽക്കെ, സമുദായ നേതാവിന്റെ ഇത്തരം പരാമർശങ്ങൾ വോട്ട് ഭിന്നിപ്പിക്കാനുള്ള ബോധപൂർവമായ നീക്കമാണോ എന്ന സംശയം രാഷ്ട്രീയ കേന്ദ്രങ്ങളിൽ ശക്തമാണ്. വരാനിരിക്കുന്ന തിരഞ്ഞെടുപ്പുകളിൽ ഈഴവ-കോൺഗ്രസ് ബന്ധത്തിൽ ഈ അഭിമുഖം വലിയ രീതിയിലുള്ള മാറ്റങ്ങൾക്കും വഴിതിരിവുകൾക്കും കാരണമാകുമെന്ന് ഉറപ്പാണ്.
