കൊച്ചി: കള്ളക്കടത്തുമായി ബന്ധപ്പെട്ട് കസ്റ്റംസ് പിടിച്ചെടുത്ത ആഢംബര കാർ താൽക്കാലികമായി വിട്ടുകിട്ടുന്നതിനായി നടൻ ദുൽഖർ സൽമാൻ അഡ്ജുഡിക്കേറ്റിംഗ് അതോറിറ്റിയെ (Adjudicating Authority) സമീപിക്കാൻ കേരള ഹൈക്കോടതി നിർദ്ദേശിച്ചു. കസ്റ്റംസ് ആക്ട് സെക്ഷൻ 110A പ്രകാരമാണ് നടൻ അപേക്ഷ നൽകേണ്ടത്.  
​കേസിലെ നിലവിലുള്ള അന്വേഷണത്തിൽ ഇടപെടാൻ ഹൈക്കോടതി വിസമ്മതിച്ചു. എന്നാൽ, ദുൽഖർ നൽകുന്ന അപേക്ഷയിൽ അതോറിറ്റി ഒരു ആഴ്ചക്കകം തീരുമാനം എടുക്കണം എന്നും കോടതി നിർബന്ധിച്ചു. നടന് ന്യായമായ വാദം കേൾക്കാനുള്ള അവസരം നൽകിയ ശേഷമായിരിക്കണം തീരുമാനം. അപേക്ഷ തള്ളുകയാണെങ്കിൽ, അതിനുള്ള കാരണങ്ങൾ വിശദീകരിക്കുന്ന ഉത്തരവും നൽകണം.

​ദുൽഖർ സൽമാൻ സമർപ്പിച്ച ഹർജി  തീർപ്പാക്കിക്കൊണ്ടാണ് കോടതിയുടെ ഈ നിരീക്ഷണം. പിടിച്ചെടുത്ത വാഹനം 20 വർഷത്തിലധികമായി നിയമപരമായി ഉപയോഗിക്കുന്നതാണ് എന്നും ഈ കാലയളവിൽ വിവിധ ട്രാൻസ്‌പോർട്ട് അധികാരികളിൽ നിന്ന് സാധുവായ രജിസ്‌ട്രേഷൻ ലഭിച്ചിട്ടുണ്ട് എന്നുമുള്ള കാര്യം, വാഹനം താൽക്കാലികമായി വിട്ടുകിട്ടാനുള്ള അപേക്ഷ പരിഗണിക്കുമ്പോൾ അധികൃതർ കണക്കിലെടുക്കണം എന്നും കോടതി വ്യക്തമാക്കി.

​നിയമവിരുദ്ധമായ ഇറക്കുമതി, അല്ലെങ്കിൽ കുറഞ്ഞ വില കാണിക്കൽ തുടങ്ങിയ വിവരങ്ങളുടെ അടിസ്ഥാനത്തിലാണ് കസ്റ്റംസ് നേരത്തെ ഈ കാർ പിടിച്ചെടുത്തത്. എന്നാൽ, വാഹനം നിയമപരമായി വാങ്ങിയതാണെന്നും വർഷങ്ങളായി തന്റെ കൈവശമുണ്ടെന്നും നടൻ കോടതിയിൽ വാദിച്ചു.

​ഹൈക്കോടതിയുടെ പുതിയ നിർദ്ദേശ പ്രകാരം, അന്വേഷണം തുടരുന്നതിനിടയിലും നടൻ ദുൽഖർ സൽമാന് തൻ്റെ വാഹനം താൽക്കാലികമായി കൈവശം വെക്കാൻ ഒരു അവസരം ലഭിച്ചിരിക്കുകയാണ്. കേസിൽ സീനിയർ അഭിഭാഷകൻ എ. കുമാറാണ് ദുൽഖറിന് വേണ്ടി ഹാജരായത്.
​ദുൽഖറിന് അങ്ങനെ താൽക്കാലിക ആശ്വാസം ലഭിച്ചു.