ദോഹ: ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽ ഥാനിയും കുവൈത്ത് വിദേശകാര്യ മന്ത്രി ഷെയ്ഖ് ജറഹ് ജാബർ അൽ അഹമ്മദ് അൽ സബാഹും തമ്മിൽ ഫോണിൽ ചർച്ച നടത്തി. ഇരു രാജ്യങ്ങളും തമ്മിലുള്ള ഉഭയകക്ഷി സഹകരണവും അത് കൂടുതൽ ശക്തിപ്പെടുത്തേണ്ടതിന്റെ വഴികളും ഇരുനേതാക്കളും സംസാരിച്ചു.
മേഖലയിലെ സുരക്ഷയും സ്ഥിരതയും വർദ്ധിപ്പിക്കുന്നതിന് സംഭാവന നൽകുന്ന തരത്തിൽ, യുണൈറ്റഡ് സ്റ്റേറ്റ്സും (US) ഇസ്ലാമിക് റിപ്പബ്ലിക് ഓഫ് ഇറാനും തമ്മിലുള്ള മധ്യസ്ഥശ്രമങ്ങളും സംഘർഷ ലഘൂകരണത്തിനായുള്ള സംയുക്ത നീക്കങ്ങളും ചർച്ചയിൽ പ്രധാന അജണ്ടയായി വന്നു.
തുടർന്നുകൊണ്ടിരിക്കുന്ന മധ്യസ്ഥശ്രമങ്ങളോട് എല്ലാ കക്ഷികളും അനുകൂലമായി പ്രതികരിക്കേണ്ടതിന്റെ ആവശ്യകത ഖത്തർ പ്രധാനമന്ത്രി ചർച്ചയിൽ ഊന്നിപ്പറഞ്ഞു. സമാധാനപരമായ മാർഗ്ഗങ്ങളിലൂടെയും ചർച്ചകളിലൂടെയും പ്രതിസന്ധിയുടെ യഥാർത്ഥ കാരണങ്ങൾ പരിഹരിക്കാൻ ഇത് വഴിതുറക്കുമെന്നും, വീണ്ടുമൊരു സംഘർഷമുണ്ടാകുന്നത് തടയുന്ന തരത്തിലുള്ള സുസ്ഥിരമായ കരാറിലേക്ക് നയിക്കാൻ ഇത് സഹായിക്കുമെന്നും അദ്ദേഹം വ്യക്തമാക്കി. മേഖലയിലെ സമാധാനശ്രമങ്ങൾ കൂടുതൽ ശക്തമാക്കാൻ ഇരുരാജ്യങ്ങളും തമ്മിലുള്ള ഏകോപനം തുടരുമെന്നും നേതാക്കൾ അറിയിച്ചു.
