ദോഹ: ഹോർമുസ് കടലിടുക്കിലൂടെ സഞ്ചരിക്കുകയായിരുന്ന യു.എ.ഇയുടെ 'അഡ്നോക്' (ADNOC) എണ്ണക്കപ്പലിന് നേരെ ഇറാൻ നടത്തിയ മിസൈൽ ആക്രമണത്തെ ഖത്തർ ശക്തമായി അപലപിച്ചു. അന്താരാഷ്ട്ര നിയമങ്ങളുടെയും സമുദ്ര നാവിക സ്വാതന്ത്ര്യത്തിന്റെയും നഗ്നമായ ലംഘനമാണിതെന്നും, ഐക്യരാഷ്ട്രസഭ രക്ഷാസമിതി പ്രമേയം 2817-ന്റെ ലംഘനമാണിതെന്നും ഖത്തർ വിദേശകാര്യ മന്ത്രാലയം പ്രസ്താവനയിലൂടെ വ്യക്തമാക്കി.
ഹോർമുസ് കടലിടുക്കിനെ സമ്മർദ്ദ തന്ത്രങ്ങൾക്കായി ഉപയോഗിക്കുന്നതിനെ പൂർണ്ണമായി തള്ളിക്കളയുന്നതായി മന്ത്രാലയം അറിയിച്ചു. മേഖലയിലെ സുപ്രധാന ജലപാത ഉപാധികളില്ലാതെ ഉടനടി തുറന്നുനൽകണം. വിദേശ കപ്പലുകളുടെ സുരക്ഷിതമായ സഞ്ചാരസ്വാതന്ത്ര്യം യാതൊരു വിട്ടുവീഴ്ചയുമില്ലാത്ത അടിസ്ഥാന തത്വമാണ്. കടലിടുക്ക് അടച്ചിടുന്നത് മേഖലയിലെ രാജ്യങ്ങളുടെയും ആഗോള സാമ്പത്തിക വ്യവസ്ഥയുടെയും സുരക്ഷയെയും നിലനിൽപ്പിനെയും പ്രതികൂലമായി ബാധിക്കും.അയൽരാജ്യങ്ങളുടെയും സൗഹൃദ രാഷ്ട്രങ്ങളുടെയും സ്വത്തുക്കൾക്ക് നേരെ ഇറാൻ നടത്തുന്ന ന്യായീകരിക്കാനാകാത്ത ഇത്തരം ആക്രമണങ്ങൾ ഉടനടി അവസാനിപ്പിക്കണമെന്ന് ഖത്തർ ആവശ്യപ്പെട്ടു. ആക്രമണത്തിനിരയായ സഹോദര രാജ്യമായ യുണൈറ്റഡ് അറബ് എമിറേറ്റ്സിന് (UAE) പൂർണ്ണ പിന്തുണ പ്രഖ്യാപിച്ച ഖത്തർ, സ്വന്തം സ്വത്തുക്കളുടെയും സുരക്ഷയുടെയും സംരക്ഷണത്തിനായി യു.എ.ഇ സ്വീകരിക്കുന്ന എല്ലാ നടപടികൾക്കും ഐക്യദാർഢ്യം പ്രഖ്യാപിക്കുകയും ചെയ്തു.
