ദോഹ/ഇസ്താംബൂൾ: ഫലസ്തീൻ വിഷയത്തിൽ ഖത്തറിന്റെ അചഞ്ചലമായ പിന്തുണ തുടരുമെന്ന് ശൂറ കൗൺസിൽ സ്പീക്കർ ഹസൻ ബിൻ അബ്ദുള്ള അൽ ഗാനിം പ്രഖ്യാപിച്ചു. തുർക്കിയിലെ ഇസ്താംബൂളിൽ നടന്ന ഇന്റർ പാർലമെന്ററി യൂണിയൻ അസംബ്ലിയുടെ ഭാഗമായി, ഫലസ്തീനെ പിന്തുണയ്ക്കുന്ന പാർലമെന്റുകളുടെ കൂട്ടായ്മയിൽ സംസാരിക്കുകയായിരുന്നു അദ്ദേഹം.
അമീർ ശൈഖ് തമീം ബിൻ ഹമദ് അൽ താനിയുടെ നിർദ്ദേശപ്രകാരം ഫലസ്തീൻ ജനതയെ രാഷ്ട്രീയമായും മാനുഷികമായും സഹായിക്കാനുള്ള ശ്രമങ്ങൾ ഖത്തർ ശക്തമായി തുടരുമെന്ന് അദ്ദേഹം ഉറപ്പുനൽകി.
ഫലസ്തീൻ അവകാശങ്ങൾ സംരക്ഷിക്കുന്നതിനായി ലോകമെമ്പാടുമുള്ള പാർലമെന്റുകൾ ഒരേ സ്വരത്തിൽ സംസാരിക്കണമെന്നും സംയുക്ത നീക്കങ്ങൾ നടത്തണമെന്നും അദ്ദേഹം ആഹ്വാനം ചെയ്തു. പ്രസ്താവനകൾക്ക് അപ്പുറം ഫലപ്രദമായ നടപടികളിലേക്ക് കടക്കണമെന്ന് അദ്ദേഹം ആവശ്യപ്പെട്ടു.അൽ-അഖ്സ പള്ളി ദീർഘകാലം അടച്ചിടുന്നതും വിശ്വാസികളെ തടയുന്നതും ആരാധനാ സ്വാതന്ത്ര്യത്തിന്മേലുള്ള കടന്നുകയറ്റമാണെന്ന് സ്പീക്കർ ചൂണ്ടിക്കാട്ടി. ഫലസ്തീൻ തടവുകാരെ വധിക്കാനുള്ള ഇസ്രായേൽ പാർലമെന്റിന്റെ (നെസെറ്റ്) നിയമനിർമ്മാണം അന്താരാഷ്ട്ര നിയമങ്ങളുടെയും ജനീവ കരാറിന്റെയും ലംഘനമാണെന്ന് അദ്ദേഹം പറഞ്ഞു.ഗാസയിലെ വെടിനിർത്തൽ കരാറിനെക്കുറിച്ച് അദ്ദേഹം ആശങ്ക രേഖപ്പെടുത്തി. സൈനിക നീക്കങ്ങൾ നിർത്താനോ മാനുഷിക സഹായങ്ങൾ എത്തിക്കാനോ തയ്യാറാകാത്ത സാഹചര്യത്തിൽ കരാറിന്റെ തുടർന്നുള്ള ഘട്ടങ്ങളുടെ പ്രസക്തി ചോദ്യം ചെയ്യപ്പെടുമെന്ന് അദ്ദേഹം ഓർമ്മിപ്പിച്ചു.
അന്താരാഷ്ട്ര വേദികളിൽ ഫലസ്തീൻ ജനതയുടെ നീതിപൂർവമായ അവകാശങ്ങൾക്കായി വാദിക്കുന്നതിൽ ശൂറ കൗൺസിൽ അതിന്റെ സജീവ സാന്നിധ്യം തുടരുമെന്ന് പറഞ്ഞാണ് അദ്ദേഹം പ്രസംഗം അവസാനിപ്പിച്ചത്.
