പാരീസ്: 2026 ഖത്തർ പ്രി ഡി ലാർക്ക് ഡി ട്രിയോംഫിനോടനുബന്ധിച്ച് പാരീസിലെ സെന്റ്-ക്ലൗഡ് റേസ് കോഴ്സിൽ നടന്ന പ്രമുഖ അറേബ്യൻ കുതിരപ്പന്തയത്തിൽ ഖത്തറിന്റെ ഷാഖബ് റേസിംഗിന് ഉജ്ജ്വല വിജയം. രണ്ട് ഗ്രൂപ്പ് 1 മത്സരങ്ങളിലും വിജയം നേടി ഷാഖബ് റേസിംഗ് ട്രോഫികൾ സ്വന്തമാക്കി.
ഖത്തർ റേസിംഗ് ആൻഡ് ഇക്വസ്ട്രിയൻ ക്ലബ് (QREC) സ്പോൺസർ ചെയ്ത മത്സരത്തിൽ ക്യു.ആർ.ഇ.സി ചെയർമാൻ ഹമദ് ബിൻ അബ്ദുൽറഹ്മാൻ അൽ അതിയ്യ, വൈസ് ചെയർമാൻ റാഷിദ് നാസർ സ്രയ്യ അൽ കഅബി, ഫ്രാൻസ് ഗാലപ് പ്രസിഡന്റ് ഗില്ലോം ഡി സെന്റ്-സെയ്ൻ തുടങ്ങിയ പ്രമുഖർ പങ്കെടുത്തു.
മൂന്ന് വയസ്സുള്ള കുതിരകളുടെ മത്സരവിഭാഗത്തിൽ (Qatar Arabian Trophy des Poulains) ഷാഖബ് റേസിംഗിന്റെ 'മസീദ്' എന്ന കുതിരയാണ് ഒന്നാമതെത്തിയത്. ജീൻ-ബെർണാഡ് എയ്ക്വെം ഓടിച്ച കുതിരയെ തോമസ് ഫോർസിയാണ് പരിശീലിപ്പിച്ചത്. ക്യു.ആർ.ഇ.സി ബോർഡ് അംഗം അബ്ദുൽറഹ്മാൻ ബിൻ മൻസൂർ അൽ മൻസൂറിൽ നിന്ന് ഷെയ്ഖ് ഹമദ് ബിൻ ജുആൻ അൽ ഥാനി ട്രോഫി ഏറ്റുവാങ്ങി.
മൂന്ന് വയസ്സുള്ള പെൺകുതിരകളുടെ 2000 മീറ്റർ മത്സരത്തിൽ (Qatar Arabian Trophy des Pouliches) ഷാഖബ് റേസിംഗിന്റെ തന്നെ 'ബൽസം' വിജയക്കൊടി പാറിച്ചു. പിയറി-ചാൾസ് ബുഡോ ഓടിച്ച ബൽസാമിന്റെ പരിശീലകൻ സേവ്യർ തോമസ് ഡെമൗൾട്ടാണ്. 13 മികച്ച കുതിരകളെ പിന്നിലാക്കിയാണ് ബൽസം ഈ വിഭാഗത്തിൽ കന്നി ഗ്രൂപ്പ് 1 വിജയം സ്വന്തമാക്കിയത്.
