ദോഹ: ബ്രസീലിയൻ ദേശീയ പെട്രോളിയം, പ്രകൃതിവാതക ഏജൻസി (ANP) സംഘടിപ്പിച്ച ആറാമത് കൺസെഷൻ ഓപ്പൺ ഏക്രേജ് ബിഡ് റൗണ്ടിൽ ഖത്തർ എനർജി ഏഴ് പര്യവേക്ഷണ ബ്ലോക്കുകൾ സ്വന്തമാക്കി. പ്രമുഖ ഊർജ്ജ കമ്പനിയായ പെട്രോബ്രാസുമായി (Petrobras) പങ്കാളിത്തത്തിൽ ചേർന്നാണ് ഖത്തർ എനർജി ഈ നേട്ടം കൈവരിച്ചത്.
ബ്രസീലിന്റെ വടക്കുകിഴക്കൻ ഇക്വറ്റോറിയൽ മാർജിനിലുള്ള സെയാര ബേസിനിൽ (Ceara Basin) സ്ഥിതി ചെയ്യുന്ന CE-M-471, CE-M-473, CE-M-475, CE-M-477, CE-M-537, CE-M-539, CE-M-665 എന്നീ ബ്ലോക്കുകളാണ് ഖത്തർ എനർജി ഉൾപ്പെടുന്ന കൺസോർഷ്യത്തിന് ലഭിച്ചത്. ധാരണപ്രകാരം ഓപ്പറേറ്ററായ പെട്രോബ്രാസിന് 70 ശതമാനവും ഖത്തർ എനർജിക്ക് 30 ശതമാനവും പങ്കാളിത്ത നിക്ഷേപമുണ്ടാകും.
ബ്രസീലിലെ ഖത്തർ എനർജിയുടെ പ്രവർത്തനങ്ങൾ കൂടുതൽ വിപുലീകരിക്കാൻ ഈ വിജയം സഹായിക്കുമെന്ന് ഊർജ്ജകാര്യ സഹമന്ത്രിയും ഖത്തർ എനർജി പ്രസിഡന്റും സി.ഇ.ഒയുമായ എൻജിനീയർ സാദ് ബിൻ ഷെരീദ അൽ കഅബി പറഞ്ഞു. പെട്രോബ്രാസ്, ANP, ബ്രസീലിയൻ ഭരണകൂടം എന്നിവർക്ക് നന്ദി അറിയിച്ച അദ്ദേഹം മേഖലയിലെ തുടർ പര്യവേക്ഷണ പ്രവർത്തനങ്ങളിൽ പങ്കാളികളുമായി സഹകരിച്ച് മുന്നോട്ടുപോകുമെന്നും കൂട്ടിച്ചേർത്തു.
ഏകദേശം 4,700 ചതുരശ്ര കിലോമീറ്റർ വിസ്തൃതിയുള്ളതാണ് ലഭിച്ച ഈ ബ്ലോക്കുകൾ. സമുദ്രനിരപ്പിൽ നിന്ന് 2,000 മുതൽ 3,600 മീറ്റർ വരെ ആഴത്തിലുള്ള പ്രദേശങ്ങളാണിത്. കൺസെഷൻ കരാറുകൾ 2027 ആദ്യ പകുതിയോടെ ഒപ്പുവെക്കുമെന്നാണ് പ്രതീക്ഷിക്കുന്നത്.
