ദോഹ: യമൻ സമുദ്രപരിധിയിൽ നിന്നും ഈജിപ്ഷ്യൻ നാവികർ സഞ്ചരിച്ച എണ്ണക്കപ്പൽ തട്ടിക്കൊണ്ടുപോയ നടപടിയെ ഖത്തർ ശക്തമായി അപലപിച്ചു. കപ്പൽ തട്ടിക്കൊണ്ടുപോയി സൊമാലിയൻ തീരത്തെ പണ്ട്‌ലാൻഡ് (Puntland) മേഖലയ്ക്ക് സമീപമെത്തിച്ച നടപടി അന്താരാഷ്ട്ര നിയമങ്ങളുടെ ലംഘനമാണെന്ന് ഖത്തർ വിദേശകാര്യ മന്ത്രാലയം പ്രസ്താവനയിൽ അറിയിച്ചു.കപ്പൽ പിടിച്ചെടുത്തത് അന്താരാഷ്ട്ര സമുദ്രഗതാഗത സുരക്ഷയ്ക്കും ആഗോള വ്യാപാരത്തിനും ഗുരുതരമായ ഭീഷണിയാണെന്ന് ഖത്തർ ചൂണ്ടിക്കാട്ടി. മേഖലയിലെ സമാധാനാന്തരീക്ഷത്തെ തകർക്കുന്ന ഇത്തരം നീക്കങ്ങൾ അംഗീകരിക്കാനാവില്ലെന്നും അധികൃതർ വ്യക്തമാക്കി.സഹോദര രാഷ്ട്രമായ ഈജിപ്തിനും കപ്പലിലെ നാവികരുടെ കുടുംബങ്ങൾക്കും ഖത്തർ പൂർണ്ണ പിന്തുണ പ്രഖ്യാപിച്ചു. നാവികരുടെ സുരക്ഷ ഉറപ്പാക്കണമെന്നും അവരെ എത്രയും വേഗം മോചിപ്പിക്കാൻ അടിയന്തര നടപടികൾ സ്വീകരിക്കണമെന്നും മന്ത്രാലയം ആവശ്യപ്പെട്ടു.സമുദ്രപാതകളിലെ സുരക്ഷിതത്വവും യാത്രാസ്വാതന്ത്ര്യവും ഉറപ്പാക്കാൻ അന്താരാഷ്ട്ര സമൂഹം ഒറ്റക്കെട്ടായി നിലകൊള്ളണമെന്ന് വിദേശകാര്യ മന്ത്രാലയം ആഹ്വാനം ചെയ്തു. ആഗോള സുസ്ഥിരതയുടെയും സാമ്പത്തിക ഭദ്രതയുടെയും അടിസ്ഥാന തൂണാണ് സുരക്ഷിതമായ സമുദ്രഗതാഗതമെന്ന് ഖത്തർ പ്രസ്താവനയിൽ ഓർമ്മിപ്പിച്ചു.
