ദോഹ: "നന്മ നിങ്ങളിൽ നിന്നാരംഭിക്കുന്നു" (Good Starts With You) എന്ന പ്രമേയത്തിൽ ഖത്തർ ചാരിറ്റി ഈ വർഷത്തെ റമദാൻ കാമ്പയിന്റെ ഭാഗമായി ലോകത്തെ 42 രാജ്യങ്ങളിൽ ഇഫ്താർ പദ്ധതി ആരംഭിച്ചു. ഇതിനകം തന്നെ വിവിധ രാജ്യങ്ങളിൽ ആയിരക്കണക്കിന് പേർക്ക് സഹായം എത്തിച്ചുകഴിഞ്ഞതായി ഖത്തർ ചാരിറ്റി വാർത്താക്കുറിപ്പിൽ അറിയിച്ചു.
ജിബൂട്ടിയിലെ തുടക്കം:
ആഫ്രിക്കൻ രാജ്യമായ ജിബൂട്ടിയിലാണ് ഈ വർഷത്തെ പദ്ധതിക്ക് സജീവമായ തുടക്കം കുറിച്ചത്. അവിടുത്തെ സാമൂഹിക കാര്യ മന്ത്രാലയത്തിന്റെയും വികലാംഗർക്കായുള്ള ദേശീയ ഏജൻസിയുടെയും സഹകരണത്തോടെയാണ് പദ്ധതി നടപ്പിലാക്കുന്നത്. ഇതിനകം 600 റമദാൻ ഭക്ഷ്യക്കിറ്റുകൾ വിതരണം ചെയ്തു കഴിഞ്ഞു. ഇതുവഴി അനാഥ കുടുംബങ്ങളും ഭിന്നശേഷിക്കാരും ഉൾപ്പെടെ 3,600 പേർക്ക് പ്രയോജനം ലഭിച്ചു. അരി, പഞ്ചസാര, എണ്ണ തുടങ്ങിയ അവശ്യ സാധനങ്ങളാണ് കിറ്റിൽ ഉൾപ്പെടുത്തിയിരിക്കുന്നത്.ഈ വർഷം ലോകമെമ്പാടുമുള്ള 4,80,299 പേർക്ക് ഇഫ്താർ പദ്ധതിയുടെ ഗുണഫലം ലഭിക്കുമെന്നാണ് പ്രതീക്ഷിക്കുന്നത്. ദാതാക്കളുടെ ഉദാരമായ സംഭാവനകളാണ് ഇത്തരമൊരു വൻപദ്ധതി വിജയകരമായി നടപ്പിലാക്കാൻ സഹായിക്കുന്നതെന്ന് ഖത്തർ ചാരിറ്റി വ്യക്തമാക്കി. റമദാൻ കാലത്തെ വർദ്ധിച്ചുവരുന്ന ചിലവുകൾക്കിടയിൽ ഈ സഹായം വലിയ ആശ്വാസമാണെന്ന് ഗുണഭോക്താക്കൾ പ്രതികരിച്ചു.
