കൊച്ചി: നടി ആക്രമിക്കപ്പെട്ട കേസിൽ നിർണായക വഴിത്തിരിവ്. കേസിലെ എട്ടാം പ്രതിയായ നടൻ ദിലീപിനെതിരെ ചുമത്തിയ പ്രധാന കുറ്റങ്ങളിൽ നിന്ന് വിമുക്തനാക്കി കോടതി . സാഹചര്യത്തെളിവുകൾ മാത്രമാണ് നിലനിൽക്കുന്നതെന്നും, ഗൂഢാലോചന സംശയാതീതമായി തെളിയിക്കാൻ പ്രോസിക്യൂഷന് കഴിഞ്ഞില്ലെന്നും വിലയിരുത്തിക്കൊണ്ടാണ് സി.ആർ.പി.സി. 235-ാം വകുപ്പുപ്രകാരം ദിലീപിനെ കോടതി കുറ്റമുക്തനാക്കിയത്.
ജഡ്ജി ഹണി എം. വർഗീസ് ആണ് കേസിൽ വിധി പറഞ്ഞത്. ദിലീപിനെതിരെ ചുമത്തിയ കൂട്ട ബലാത്സംഗം, ക്രിമിനൽ ഗൂഢാലോചന, സ്ത്രീത്വത്തെ അപമാനിക്കൽ, അന്യായ തടങ്കൽ, ബലപ്രയോഗം, ഐ.ടി ആക്ട് 66ഇ/67 എ (അശ്ലീലചിത്രമെടുക്കൽ, പ്രചരിപ്പിക്കൽ), തെളിവ് നശിപ്പിക്കൽ, മറച്ചുവെക്കൽ തുടങ്ങിയ ഗുരുതര വകുപ്പുകളിൽ നിന്നാണ് പ്രതിയെ ഒഴിവാക്കിയത്.
കോടതിയുടെ നിരീക്ഷണപ്രകാരം:
- ഗൂഢാലോചന തെളിയിക്കുന്നതിൽ പ്രോസിക്യൂഷൻ പരാജയപ്പെട്ടു.
- ദിലീപിനെതിരെ ഹാജരാക്കിയത് സാഹചര്യത്തെളിവുകൾ മാത്രമാണ്.
പ്രധാന കുറ്റങ്ങളിൽ നിന്ന് വിമുക്തനാക്കിയതോടെ, ദിലീപിന്റെ നിയമപരമായ പോരാട്ടത്തിൽ വലിയ ആശ്വാസമാണ് ഉണ്ടായിരിക്കുന്നത്.
കേസിന്റെ തുടർച്ചയിലും ഈ വിധി വലിയ ചലനങ്ങൾ സൃഷ്ടിക്കുമെന്നാണ് നിയമവൃത്തങ്ങൾ വിലയിരുത്തുന്നത്. പ്രോസിക്യൂഷന്റെ അടുത്ത നീക്കം എന്തായിരിക്കുമെന്ന ആകാംക്ഷയിലാണ് നിയമലോകം.
