ദോഹ: ഖത്തറിലെ ജനങ്ങൾക്ക് കൂടുതൽ എളുപ്പത്തിൽ ചികിത്സ ലഭ്യമാക്കുക എന്ന ലക്ഷ്യത്തോടെ പ്രൈമറി ഹെൽത്ത് കെയർ കോർപ്പറേഷൻ (PHCC) രാജ്യത്തെ 15 ഹെൽത്ത് സെന്ററുകളിൽ ഫിസിയോതെറാപ്പി സേവനം വ്യാപിപ്പിച്ചു. നിലവിൽ 69 വിദഗ്ധരാണ് ഈ വിഭാഗത്തിൽ സേവനമനുഷ്ഠിക്കുന്നത്.
ശനിയാഴ്ച ദിവസങ്ങളിൽ രാവിലെ 7 മണി മുതൽ ഉച്ചയ്ക്ക് 2 മണി വരെ പ്രത്യേക ഫിസിയോതെറാപ്പി ക്ലിനിക്കുകൾ പ്രവർത്തിക്കുമെന്ന് ഫിസിയോതെറാപ്പി സർവീസ് ഡയറക്ടർ ഡോ. താജ്ബ മുബാറക് അൽ ബദർ അറിയിച്ചു. അബുബക്കർ അൽ സിദ്ദിഖ്, ഗരാഫത്ത് അൽ റയ്യാൻ, ലബൈബ്, മുഐതർ, റൗദത്ത് അൽ ഖൈൽ എന്നീ 5 പ്രധാന സെന്ററുകളിലാണ് ശനിയാഴ്ചകളിൽ പുരുഷന്മാർക്കും സ്ത്രീകൾക്കുമായി പ്രത്യേക ക്ലിനിക്കുകൾ ഉള്ളത്. കഴിഞ്ഞ വർഷം മാത്രം ശനിയാഴ്ചകളിലെ ഈ സേവനം വഴി 2,620 രോഗികൾക്ക് പ്രയോജനം ലഭിച്ചു. 14 വയസ്സിന് മുകളിലുള്ളവരുടെ പേശി, സന്ധി സംബന്ധമായ പ്രശ്നങ്ങൾക്കാണ് ഇവിടെ പ്രധാനമായും ചികിത്സ നൽകുന്നത്.
