ജറുസലേം: പ്രധാനമന്ത്രി ബെഞ്ചമിൻ നെതന്യാഹുവിനെ അധികാരത്തിൽനിന്ന് മാറ്റാനുള്ള നീക്കങ്ങൾ തുടരുന്നതിനിടെ, പുതിയ സർക്കാർ രൂപീകരിക്കാൻ യാഷർ പാർട്ടി നേതാവ് ഗാദി ഐസൻകോട്ടിന് പ്രസിഡന്റ് ഐസക് ഹെർസോഗ് ഔദ്യോഗികമായി ചുമതല നൽകി. ഞായറാഴ്ച പ്രസിഡന്റിന്റെ ഔദ്യോഗിക വസതിയിൽ നടന്ന ചടങ്ങിലാണ് സർക്കാർ രൂപീകരണത്തിനുള്ള നിയോഗം കൈമാറിയത്.

സർക്കാർ രൂപീകരിക്കാൻ ഐസൻകോട്ടിന് 28 ദിവസത്തെ സമയമാണ് അനുവദിച്ചിരിക്കുന്നത്. ആവശ്യമെങ്കിൽ പ്രസിഡന്റിന് 14 ദിവസം കൂടി കാലാവധി നീട്ടിനൽകാം.

67 എംപിമാരുടെ പിന്തുണയുമായി ഐസൻകോട്ട്

കഴിഞ്ഞ ആഴ്ച പ്രസിഡന്റ് ഹെർസോഗ് വിവിധ പാർട്ടികളുടെ പ്രതിനിധികളുമായി നടത്തിയ കൂടിയാലോചനയിൽ ഐസൻകോട്ടിന് 67 പേരുടെ പിന്തുണ ലഭിച്ചു. അതേസമയം, നെതന്യാഹുവിന് 46 പേരുടെ പിന്തുണ മാത്രമാണ് ലഭിച്ചത്.

അറബ് പാർട്ടികളായ റആമും ജോയിന്റ് ലിസ്റ്റും ഐസൻകോട്ടിനെ പിന്തുണച്ചു. എന്നാൽ, ഇവരുടെ ശുപാർശകൾ അന്തിമമായി അദ്ദേഹത്തിന്റെ സഖ്യസർക്കാരിൽ ചേരുമെന്ന ഉറപ്പായി കണക്കാക്കാനാകില്ല.

തിരഞ്ഞെടുപ്പ് ഫലം ഇസ്രയേലിൽ രാഷ്ട്രീയ അനിശ്ചിതത്വമാണ് സൃഷ്ടിച്ചിരിക്കുന്നത്. 120 അംഗ പാർലമെന്റായ നെസറ്റിൽ സർക്കാർ രൂപീകരിക്കാൻ ആവശ്യമായ 61 സീറ്റുകളുടെ ഭൂരിപക്ഷം ഒരു മുന്നണിക്കും ലഭിച്ചില്ല. നെതന്യാഹുവിന്റെ പക്ഷത്തിന് 53 സീറ്റും പ്രതിപക്ഷ മുന്നണിക്ക് 48 സീറ്റുമാണ് ലഭിച്ചത്. അറബ് പാർട്ടികളായ റആമും ജോയിന്റ് ലിസ്റ്റും ചേർന്ന് റെക്കോർഡ് 19 സീറ്റുകൾ നേടി.

നെതന്യാഹുവിനെ പിന്തുണച്ച് ശുപാർശ നൽകിയ പാർട്ടികളിൽ ലിക്കുഡ്, ദേശീയ സുരക്ഷാ മന്ത്രി ഇറ്റാമർ ബെൻ ഗ്വിറിന്റെ ഓട്സ്മ യെഹുദിത്, ധനമന്ത്രി ബെസലേൽ സ്മോട്രിച്ചിന്റെ റിലീജിയസ് സയണിസ്റ്റ് പാർട്ടി, മോശെ ഫെയ്ഗ്ലിന്റെ സെഹുത്, ആര്യേ ദേരിയുടെ ഷാസ് എന്നിവ ഉൾപ്പെടുന്നു.

എന്നാൽ, നെതന്യാഹുവിന്റെ ദീർഘകാല സഖ്യകക്ഷിയായ അൾട്രാ ഓർത്തഡോക്സ് വിഭാഗത്തിന്റെ യുണൈറ്റഡ് തോറ ജൂഡായിസം (യുടിജെ) ഒരു പ്രധാനമന്ത്രി സ്ഥാനാർഥിയെയും പിന്തുണയ്ക്കാൻ തയ്യാറായില്ല.

നെതന്യാഹുവുമായുള്ള അഭിപ്രായവ്യത്യാസങ്ങളാണ് യുടിജെയുടെ ഈ നിലപാടിനു പിന്നിലെന്നാണ് റിപ്പോർട്ടുകൾ. പ്രതിപക്ഷത്തിന് അനുകൂലമായ രാഷ്ട്രീയ സാഹചര്യം സൃഷ്ടിക്കുന്നതാണ് പാർട്ടിയുടെ തീരുമാനം. അൾട്രാ ഓർത്തഡോക്സ് പാർട്ടികളെ സഖ്യത്തിൽ ഉൾപ്പെടുത്തുന്നതിൽ കൂടുതൽ അനുകൂല സമീപനം പ്രതിപക്ഷ നേതാക്കൾ അടുത്തിടെ സ്വീകരിച്ചിരുന്നു. ഇതിന്റെ ഭാഗമായി അവരുമായി ചർച്ചകളും ആരംഭിച്ചിട്ടുണ്ട്.

രാഷ്ട്രീയ പ്രതിസന്ധി തുടർന്നാൽ ഇസ്രയേലിൽ വീണ്ടും തിരഞ്ഞെടുപ്പ് നടക്കാനുള്ള സാധ്യതയുണ്ട്. അതേസമയം, സഖ്യകക്ഷികളുമായി ചർച്ച നടത്തി ധാരണയിലെത്താനും പാർട്ടികൾക്ക് കഴിയും. നെതന്യാഹുവും ഐസൻകോട്ടിന്റെ പ്രതിപക്ഷ ചേരിയിലെ ചില കക്ഷികളും ചേർന്നുള്ള ഐക്യസർക്കാർ, അല്ലെങ്കിൽ ന്യൂനപക്ഷ സർക്കാർ എന്നിവയും സാധ്യതകളാണ്.

സർക്കാർ രൂപീകരണം പരാജയപ്പെട്ടാൽ എന്ത് സംഭവിക്കും?

നിശ്ചിത സമയത്തിനുള്ളിൽ സർക്കാർ രൂപീകരിക്കാൻ കഴിയാതിരിക്കുകയോ, ശ്രമം പരാജയപ്പെട്ടതായി ഐസൻകോട്ട് പ്രസിഡന്റിനെ അറിയിക്കുകയോ, അദ്ദേഹം അവതരിപ്പിക്കുന്ന സർക്കാരിന് പാർലമെന്റിൽ വിശ്വാസവോട്ട് നേടാനാകാതിരിക്കുകയോ ചെയ്താൽ അടുത്ത നടപടികൾ തീരുമാനിക്കാൻ പ്രസിഡന്റിന് മൂന്ന് ദിവസത്തെ സമയമുണ്ടാകും.

മറ്റൊരു പാർലമെന്റ് അംഗത്തെ സർക്കാർ രൂപീകരിക്കാൻ നിയോഗിക്കുകയോ, സർക്കാർ രൂപീകരണത്തിന് സാധ്യതയില്ലെന്ന് നെസറ്റ് സ്പീക്കറെ അറിയിക്കുകയോ ചെയ്യാം.

രണ്ടാമതായി നിയോഗിക്കപ്പെടുന്ന വ്യക്തിക്ക് സഖ്യസർക്കാർ രൂപീകരിക്കാൻ 28 ദിവസത്തെ സമയമാണ് ലഭിക്കുക. ഈ കാലാവധി നീട്ടിനൽകാൻ കഴിയില്ല.

രണ്ടാമത്തെ ശ്രമവും പരാജയപ്പെട്ടാൽ, അല്ലെങ്കിൽ മറ്റൊരാൾക്ക് ചുമതല നൽകേണ്ടതില്ലെന്ന് പ്രസിഡന്റ് തീരുമാനിച്ചാൽ, 21 ദിവസത്തെ പ്രത്യേക കാലയളവ് ആരംഭിക്കും. ഈ സമയത്ത് കുറഞ്ഞത് 61 പാർലമെന്റ് അംഗങ്ങൾക്ക് ഒരുമിച്ച് ഒരു പ്രത്യേക അംഗത്തെ സർക്കാർ രൂപീകരിക്കാൻ നിയോഗിക്കണമെന്ന് പ്രസിഡന്റിനോട് ആവശ്യപ്പെടാം. അങ്ങനെ നിയോഗിക്കപ്പെടുന്ന വ്യക്തിക്ക് സർക്കാർ രൂപീകരിക്കാൻ 14 ദിവസമാണ് ലഭിക്കുക.

ഈ ശ്രമങ്ങളും പരാജയപ്പെട്ടാൽ നെസറ്റ് പിരിച്ചുവിടുകയും രാജ്യത്ത് വീണ്ടും തിരഞ്ഞെടുപ്പ് നടത്തുകയും ചെയ്യും. പുതിയ സർക്കാർ പാർലമെന്റിന്റെ വിശ്വാസം നേടി അധികാരമേൽക്കുന്നതുവരെ നിലവിലെ സർക്കാർ കാവൽസർക്കാരായി തുടരും.