ന്യൂഡൽഹി: കോടതി നടപടികളിൽ ആർട്ടിഫിഷ്യൽ ഇന്റലിജൻസ്  ഉപയോഗിച്ച് നിർമ്മിച്ച വ്യാജമോ സാങ്കൽപ്പികമോ ആയ മുൻകാല കോടതി വിധികൾ  ഹാജരാക്കുന്നതിനെതിരെ കർശന നിലപാടുമായി സുപ്രീം കോടതി. യാഥാർത്ഥ്യത്തിൽ ഇല്ലാത്ത ഇത്തരം വിധികൾ കൃത്യത പരിശോധിക്കാതെ കോടതിയിൽ സമർപ്പിക്കുന്നത് അഭിഭാഷകരുടെ ഭാഗത്തുനിന്നുള്ള ഗുരുതരമായ തൊഴിൽപരമായ വീഴ്ചയായി  കണക്കാക്കുമെന്ന് കോടതി വ്യക്തമാക്കി. ഇതിനോട് രാജ്യം ഒട്ടും സഹിഷ്ണുത കാട്ടുകയില്ലെന്നും സുപ്രീം കോടതി ഓർമ്മിപ്പിച്ചു.
​കേസുകളിൽ തീരുമാനമെടുക്കുമ്പോൾ കോടതികൾക്കോ ട്രിബ്യൂണലുകൾക്കോ ഇത്തരം കൃത്രിമ വിധിന്യായങ്ങളെ ആശ്രയിക്കാനാകില്ലെന്ന് ജസ്റ്റിസ് പി.എസ്. നരസിംഹ, ജസ്റ്റിസ് അലോക് ആരാധെ എന്നിവരടങ്ങിയ ബെഞ്ച് നിരീക്ഷിച്ചു. ഇത്തരം വ്യാജ വിവരങ്ങളുടെ സ്വാധീനത്തിൽ പുറപ്പെടുവിക്കുന്ന ഒരു ഉത്തരവും നിയമത്തിന് മുന്നിൽ സാധുതയുള്ളതായിരിക്കില്ല. കേസുമായി ബന്ധപ്പെട്ട് മുംബൈ നാഷണൽ കമ്പനി ലോ ട്രിബ്യൂണലും (NCLT), നാഷണൽ കമ്പനി ലോ അപ്പലേറ്റ് ട്രിബ്യൂണലും (NCLAT) പുറപ്പെടുവിച്ച ഉത്തരവുകൾ സുപ്രീം കോടതി റദ്ദാക്കി. എഐ നിർമ്മിതമായ ആറ് വ്യാജ വിദ്ധ്യന്യായങ്ങളെ ആശ്രയിച്ചാണ് ട്രിബ്യൂണലുകൾ വിധി പ്രസ്താവിച്ചതെന്ന് കണ്ടെത്തിയതിനെ തുടർന്നാണിത്.
​അഭിഭാഷകരും ജഡ്ജിമാരും ഒരുപോലെ ജാഗ്രത പാലിക്കണമെന്ന് കോടതി മുന്നറിയിപ്പ് നൽകി. പരിശോധിക്കാത്ത എഐ വിവരങ്ങൾ കോടതിയിൽ ഹാജരാക്കുന്നത് അഭിഭാഷകരുടെ വീഴ്ചയാണെങ്കിൽ, അത് വിശ്വസിച്ച് വിധി പ്രസ്താവിക്കുന്നത് ജഡ്ജിമാരുടെ ഭാഗത്തുനിന്നുള്ള ഗുരുതരമായ ജാഗ്രതക്കുറവാണെന്ന് ബെഞ്ച് ചൂണ്ടിക്കാട്ടി. ഒരു കേസിന്റെ വിധി നിർണ്ണയത്തിൽ ഇത്തരം വ്യാജ വിധികൾക്ക് വളരെ ചെറിയ പങ്ക് മാത്രമേ ഉള്ളൂ എങ്കിൽ പോലും, നീതിന്യായ വ്യവസ്ഥയുടെ സുതാര്യതയെ ബാധിക്കുന്നതിനാൽ ആ വിധി പൂർണ്ണമായും റദ്ദാക്കേണ്ടതുണ്ടെന്നും സുപ്രീം കോടതി വ്യക്തമാക്കി.
​എഐ നിർമ്മിത വ്യാജ വിധികൾ ഉപയോഗിക്കുന്നത് തടയാൻ ആവശ്യമായ മാർഗ്ഗനിർദ്ദേശങ്ങൾ രൂപീകരിക്കാൻ ബാർ കൗൺസിലിന് കോടതി നിർദ്ദേശം നൽകി. നിയമങ്ങൾ ലംഘിക്കുന്ന അഭിഭാഷകർക്കെതിരെ അച്ചടക്ക നടപടിയുണ്ടാകുമെന്നും കോടതി സൂചന നൽകി.
​ജമ്മു ആൻഡ് കശ്മീർ ബാങ്ക് ലിമിറ്റഡ് എസ്സൽ ഇൻഫ്രാപ്രൊജക്ട്സ് ലിമിറ്റഡിനെതിരെ നൽകിയ ഇൻസോൾവൻസി നടപടികളിൽ നിന്നാണ് ഈ കേസിന്റെ ഉത്ഭവം. കോടതികളിൽ അഭിഭാഷകർ വിധികൾ ഉദ്ധരിക്കുമ്പോൾ ജഡ്ജിമാർ സാധാരണയായി അവരെ വിശ്വസിക്കാറാണ് പതിവെന്നും, എന്നാൽ വ്യാജ വിധികൾ നൽകുന്നത് നിയമവാഴ്ചയെ അട്ടിമറിക്കുന്നതിന് തുല്യമാണെന്നും സുപ്രീം കോടതി ആശങ്ക പ്രകടിപ്പിച്ചു.
​അതേസമയം, നിയമപരമായ ആവശ്യങ്ങൾക്ക് ആർട്ടിഫിഷ്യൽ ഇന്റലിജൻസ്  സാങ്കേതികവിദ്യ ഉപയോഗിക്കുന്നതിനെ കോടതി പൂർണ്ണമായി വിലക്കുന്നില്ല. വിദേശത്തോ സ്വദേശത്തോ ഇല്ലാത്ത വിധികൾ എഐ ടൂളുകൾ 'ഉണ്ടാക്കി' നൽകുന്നത് അതേപടി പരിശോധനയില്ലാതെ കോടതിയിൽ ഹാജരാക്കുന്നതിനെ മാത്രമാണ് കോടതി എതിർക്കുന്നത്. ഇന്ത്യയിലെ നിയമരംഗത്ത് എഐ ടൂളുകളുടെ ഉപയോഗം വർദ്ധിച്ചുവരുന്ന സാഹചര്യത്തിൽ ഈ വിധിക്ക് വലിയ പ്രാധാന്യമുണ്ട്.