തിരുവനന്തപുരം: കേരള രാഷ്ട്രീയത്തിൽ അത്യപൂർവ്വമായ ഭരണ-പ്രതിപക്ഷ സ്ഥാനാരോഹണങ്ങൾക്ക് തലസ്ഥാനം സാക്ഷ്യം വഹിക്കുന്നു. യു.ഡി.എഫ് സർക്കാരിൽ വി.ഡി. സതീശൻ മുഖ്യമന്ത്രിയായി അധികാരമേറ്റതിന് പിന്നാലെ, ഇടതുപക്ഷത്തിന്റെ നിയമസഭാ കക്ഷി നേതാവായി പിണറായി വിജയനെ സി.പി.എം തിരഞ്ഞെടുത്തു. ഇതോടെ സംസ്ഥാനത്തിന്റെ പുതിയ പ്രതിപക്ഷ നേതാവായി പിണറായി വിജയൻ ചുമതലയേൽക്കും.
​സി.പി.എം സംസ്ഥാന സമിതി യോഗത്തിലാണ് പിണറായി വിജയനെ പ്രതിപക്ഷ നേതാവാക്കാൻ ഏകകണ്ഠമായി തീരുമാനിച്ചത്. തിരഞ്ഞെടുപ്പിൽ തിരിച്ചടിയുണ്ടായെങ്കിലും സഭയ്ക്കുള്ളിൽ സർക്കാരിനെ നേരിടാൻ പിണറായിയുടെ അനുഭവസമ്പത്ത് തന്നെ വേണമെന്ന് പാർട്ടി വിലയിരുത്തി. തീരുമാനം സി.പി.എം സംസ്ഥാന സെക്രട്ടറി എം.വി. ഗോവിന്ദൻ ഔദ്യോഗികമായി പ്രഖ്യാപിച്ചു.
​മാറുന്ന പോർമുഖം
​കഴിഞ്ഞ നിയമസഭാ കാലയളവിൽ മുഖ്യമന്ത്രിയും പ്രതിപക്ഷ നേതാവുമായി നേർക്കുനേർ നിന്നവർ ഇപ്പോൾ കസേരകൾ പരസ്പരം കൈമാറിയിരിക്കുകയാണ്. 2016 മുതൽ രണ്ടു തവണ മുഖ്യമന്ത്രിയായിരുന്ന പിണറായി വിജയൻ ഇതാദ്യമായാണ് പ്രതിപക്ഷ നേതാവിന്റെ റോളിലെത്തുന്നത്. നായനാർ മന്ത്രിസഭയിൽ വൈദ്യുതി മന്ത്രിയായും പിന്നീട് സി.പി.എം സംസ്ഥാന സെക്രട്ടറിയായും ദീർഘകാലം പ്രവർത്തിച്ചിട്ടുള്ള പിണറായിയുടെ രാഷ്ട്രീയ ജീവിതത്തിലെ പുതിയ ഘട്ടമാണിത്.
​സഭയിൽ തീപ്പൊരി പാറും
​മുഖ്യമന്ത്രിയും പ്രതിപക്ഷ നേതാവും ഒരേ ദിവസം പ്രഖ്യാപിക്കപ്പെട്ടു എന്നത് രാഷ്ട്രീയ കേരളത്തിന് കൗതുകമായി. വാക്പോരുകളിൽ മുൻപും സഭയെ മുൾമുനയിൽ നിർത്തിയിട്ടുള്ളവരാണ് ഇരുവരും.
മുഖ്യമന്ത്രി ​വി.ഡി. സതീശൻ വിഷയങ്ങളെ കുറിച്ചുള്ള ആഴത്തിലുള്ള പഠനവും ഉരുളയ്ക്ക് ഉപ്പേരി പോലെയുള്ള മറുപടികളുമാണ് സതീശന്റെ കരുത്ത്.
​പിണറായി വിജയൻ: ദീർഘകാലത്തെ പാർലമെന്ററി പരിചയവും എതിരാളികളെ മുറിവേൽപ്പിക്കുന്ന മൂർച്ചയുള്ള വാക്കുകളുമാണ് പിണറായിയുടെ ആയുധങ്ങൾ.
​കരുത്തും ദൗർബല്യവും
​ഇടതുപക്ഷ നിരയിൽ പി. രാജീവ്, എം.ബി. രാജേഷ് എന്നിവരെപ്പോലെയുള്ള മികച്ച വാഗ്മികളുടെ അഭാവം പ്രതിപക്ഷത്തിന് തിരിച്ചടിയായേക്കാം. എന്നാൽ ഭരണപക്ഷത്ത് കെ. മുരളീധരൻ, വി.ടി. ബൽറാം, മാത്യു കുഴൽനാടൻ തുടങ്ങിയവരുടെ സാന്നിദ്ധ്യം സർക്കാരിന് കരുത്തു പകരുന്നു. പഴയ പല വിവാദങ്ങളും ഇനിയും അടങ്ങാത്ത പശ്ചാത്തലത്തിൽ, വരും ദിവസങ്ങളിൽ സഭയ്ക്കുള്ളിൽ പുതിയ പോരാട്ടങ്ങൾക്കാണ് വഴിതുറക്കുന്നത്.