ന്യൂഡൽഹി: പാർലമെന്റിന്റെ മൺസൂൺ സമ്മേളനത്തിന് മുന്നോടിയായി ചേർന്ന സർവകക്ഷി യോഗത്തിൽ തൃണമൂൽ കോൺഗ്രസിൽ നിന്ന് വിമതരായ എംപിമാരെ ക്ഷണിച്ചതിനെതിരെ പ്രതിപക്ഷം പ്രതിഷേധിച്ചു. ഇതിന്റെ ഭാഗമായി പ്രതിപക്ഷ പാർട്ടികൾ യോഗം പ്രതീകാത്മകമായി ബഹിഷ്കരിച്ച ശേഷം പിന്നീട് യോഗത്തിൽ പങ്കെടുത്തു.
മമത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസിൽ നിന്ന് വേർപെട്ട ഏകദേശം 20 എംപിമാർ ഉൾപ്പെട്ട നാഷനലിസ്റ്റ് സിറ്റിസൻസ് പാർട്ടി ഓഫ് ഇന്ത്യ (എൻസിപിഐ) എന്ന പാർട്ടിയെ സർവകക്ഷി യോഗത്തിലേക്ക് ക്ഷണിച്ചതാണ് പ്രതിഷേധത്തിന് കാരണമായത്. പാർലമെന്റിന്റെ ഔദ്യോഗിക വെബ്സൈറ്റിൽ ഈ പാർട്ടിയുടെ പേര് പോലും ഇല്ലെന്നും, ബന്ധപ്പെട്ട എംപിമാരെ ഇപ്പോഴും തൃണമൂൽ അംഗങ്ങളായാണ് രേഖപ്പെടുത്തിയിരിക്കുന്നതെന്നും പ്രതിപക്ഷം ചൂണ്ടിക്കാട്ടി.
അതേസമയം, നാളെ ആരംഭിക്കുന്ന പാർലമെന്റിന്റെ വർഷകാല സമ്മേളനത്തിൽ കേന്ദ്രസർക്കാരിനെയും ബിജെപിയെയും പ്രതിരോധത്തിലാക്കാൻ കഴിയുന്ന നിരവധി വിഷയങ്ങളുമായി പ്രതിപക്ഷം ഒരുങ്ങുകയാണ്. മറുവശത്ത്, വിവിധ പാർട്ടികളിൽ നിന്ന് കൂറുമാറിയ എംപിമാരുടെയും പുതുതായി രാജ്യസഭയിലെത്തിയ അംഗങ്ങളുടെയും പിന്തുണയോടെ എൻഡിഎ പാർലമെന്റിലെ അംഗബലം കൂടുതൽ ശക്തിപ്പെടുത്തിയിട്ടുണ്ട്.
തൃണമൂൽ കോൺഗ്രസിലെ വിമതർക്കൊപ്പം ഉദ്ധവ് താക്കറെ വിഭാഗം ശിവസേനയിലെയും ആംആദ്മി പാർട്ടിയിലെയും ചില എംപിമാരും എൻഡിഎയ്ക്ക് പിന്തുണ നൽകുന്നുവെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്.
