ദോഹ:ചുവരുകൾക്കുള്ളിൽ ഒതുങ്ങിനിന്ന സർഗ്ഗാത്മകതയ്ക്കും തൊഴിൽ സ്വപ്നങ്ങൾക്കും ചിറകുമുളപ്പിച്ചു കൊണ്ട് ഖത്തറിന്റെ സാമ്പത്തിക മാപ്പിൽ പുതിയ ചരിത്രം കുറിക്കപ്പെടുന്നു. കേവലം 300 റിയാൽ എന്ന ചെറിയ തുകയിൽ സ്വന്തം വീടുകളെത്തന്നെ കൊച്ചു വ്യവസായശാലകളാക്കി മാറ്റാൻ അവസരമൊരുക്കിയ മന്ത്രാലയത്തിന്റെ തീരുമാനം, ആയിരക്കണക്കിന് പ്രവാസി-ദേശീയ കുടുംബങ്ങളുടെ പ്രതീക്ഷകൾക്കാണ് പുതുവെളിച്ചമേകുന്നത്. 1,500 റിയാലിൽ നിന്നും ലൈസൻസ് ഫീസ് കുത്തനെ കുറച്ചതിനോടൊപ്പം, വീട്ടിലിരുന്ന് ചെയ്യാവുന്ന വാണിജ്യ പ്രവർത്തനങ്ങളുടെ എണ്ണം 15-ൽ നിന്നും 63 ആയി ഉയർത്തുകയും ചെയ്തതോടെ, ഈന്തപ്പഴം വറുക്കുന്ന പരമ്പരാഗത രീതികൾ മുതൽ കമ്പ്യൂട്ടർ പ്രോഗ്രാമിംഗും ആഭരണ രൂപകൽപ്പനയും വരെയുള്ള മേഖലകൾ ഇനി ജനകീയ സംരംഭങ്ങളായി മാറും.
​മൂന്ന് പതിറ്റാണ്ട് മുൻപ് കുടുംബങ്ങളുടെ ഉപജീവനത്തിന് താങ്ങാവുക എന്ന ലക്ഷ്യത്തോടെ ആരംഭിച്ച 'മിൻ അൽ-വതൻ'
 പദ്ധതി ഇന്ന് ഖത്തറിന്റെ സാമ്പത്തിക വൈവിധ്യവൽക്കരണത്തിന്റെയും സ്ത്രീ ശാക്തീകരണത്തിന്റെയും വലിയൊരു ചാലകശക്തിയായി വളർന്നിരിക്കുകയാണ്. വാണിജ്യ വ്യവസായ മന്ത്രാലയവും സാമൂഹിക വികസന കുടുംബ മന്ത്രാലയവും കൈകോർത്ത് നടപ്പിലാക്കുന്ന 'മിൻ അൽ-വതൻ' 
പദ്ധതിയിലൂടെ കഴിഞ്ഞ വർഷം മാത്രം 708 കുടുംബങ്ങളാണ് സ്വയംപര്യാപ്തതയുടെ പതാകവാഹകരായത്. ഇതിൽ വലിയൊരു ശതമാനവും സ്ത്രീകളുടെ പങ്കാളിത്തമാണെന്നത് നാടിന്റെ പെൺ കരുത്തിന്റെ തെളിവായി മാറുന്നു.
​തവാർ മാളിലെ പാരമ്പര്യ വിപണിയും കതാറ സാംസ്കാരിക ഗ്രാമത്തിലെ എക്സിബിഷനുകളും വഴി തങ്ങളുടെ ഉൽപ്പന്നങ്ങൾ ജനങ്ങളിലേക്ക് നേരിട്ടെത്തിക്കാൻ വീട്ടമ്മമാർക്ക് സാധിച്ചു. വിൽക്കുന്ന ഉൽപ്പന്നങ്ങളുടെ മുഴുവൻ ലാഭവും ഇടനിലക്കാരുടെ ചൂഷണമില്ലാതെ നേരിട്ട് സംരംഭകരിലേക്ക് എത്തുന്നുവെന്നതാണ് ഈ പ്രയാണത്തിന് മാറ്റൂട്ടുന്നത്. ഭക്ഷണപദാർത്ഥങ്ങൾ, ഫാഷൻ ഡിസൈനിംഗ്, സുഗന്ധദ്രവ്യങ്ങൾ, ഹാൻഡ് ക്രാഫ്റ്റുകൾ എന്നിവയിലാണ് വീട്ടകങ്ങളിലെ ഈ വ്യവസായ വിപ്ലവം കൂടുതൽ ശോഭിക്കുന്നത്.
​വീടിന്റെ സൗകര്യത്തിൽ ഇരുന്ന് കുടുംബ ഉത്തരവാദിത്തങ്ങൾക്കൊപ്പം പുതിയൊരു ബ്രാൻഡിന് ജന്മം നൽകാൻ കഴിയുന്നു എന്നത് സ്ത്രീകളെ സംബന്ധിച്ച് ഏറെ ആശ്വാസകരമാണ്. പ്രാരംഭ മൂലധനം കുറവും, സാങ്കേതികവിദ്യയുടെയും സോഷ്യൽ മീഡിയയുടെയും അനന്തസാധ്യതകളും ഉപയോഗിച്ച് വളരുന്ന ഈ കുഞ്ഞു ബിസിനസുകൾ പതുക്കെ വലിയ വാണിജ്യ സംരംഭങ്ങളായി മാറി മറ്റുള്ളവർക്ക് തൊഴിൽ നൽകുന്ന ഘട്ടത്തിലേക്ക് വളരുകയാണ്. ഖത്തർ ഡെവലപ്‌മെന്റ് ബാങ്ക് നൽകുന്ന സാമ്പത്തിക പിന്തുണ കൂടിയായപ്പോൾ, ലളിതമായ അക്ഷരങ്ങളിൽ തുടങ്ങി നാടിന്റെ സാമ്പത്തിക ഭൂപടത്തിൽ വിസ്മയം തീർക്കുന്ന കവിതയായി മാറുകയാണ് ഈ 300 റിയാൽ ലൈസൻസ് വിപ്ലവം.