​ദോഹ: ആകാശത്ത് മിസൈലുകൾ തകർക്കപ്പെടുമ്പോഴുണ്ടാകുന്ന വലിയ ശബ്ദത്തെയും പ്രകമ്പനത്തെയും കുറിച്ച് പൊതുജനങ്ങൾ അറിഞ്ഞിരിക്കേണ്ട വസ്തുതകൾ വ്യക്തമാക്കി ഗവൺമെന്റ് കമ്മ്യൂണിക്കേഷൻസ് ഓഫീസ്. സുരക്ഷാ മുൻകരുതലിന്റെ ഭാഗമായാണ് 5
വസ്തുതകൾ മന്ത്രാലയം വിശദീകരിക്കുന്നത്.

​1. എന്താണ് ആ വലിയ ശബ്ദത്തിന് പിന്നിൽ?

​അസാധാരണമായ വലിയ ശബ്ദങ്ങൾ കേൾക്കുന്നത് ഖത്തറിന്റെ വ്യോമ പ്രതിരോധ സംവിധാനങ്ങൾ (Air Defense Systems) ശത്രു മിസൈലുകളെ ആകാശത്തുവെച്ച് തകർക്കുന്നതിനാലാണ്. പൊതുജനങ്ങളുടെ സുരക്ഷ ഉറപ്പാക്കാനുള്ള മുൻകരുതൽ നടപടിയാണിത്.

​2. ശബ്ദത്തിനൊപ്പം പ്രകമ്പനം ഉണ്ടാകുന്നത് എന്തുകൊണ്ട്?

​ഉയർന്ന ആകാശത്തുവെച്ച് മിസൈലുകൾ പൊട്ടിത്തെറിക്കുമ്പോൾ വലിയ മർദ്ദത്തിലുള്ള തരംഗങ്ങൾ (Pressure waves) ഉണ്ടാകുന്നു. ഇവ കെട്ടിടങ്ങളിലും ജനലുകളിലും തട്ടുമ്പോഴാണ് ഭൂമികുലുക്കം പോലെ നമുക്ക് അനുഭവപ്പെടുന്നത്. ഇത് താഴെ മിസൈൽ പതിച്ചതിന്റെ സൂചനയല്ല, മറിച്ച് ആകാശത്തെ പ്രതിരോധത്തിന്റെ ഫലമാണ്.

​3. ശബ്ദം ഇത്ര അടുത്ത് കേൾക്കാൻ കാരണമെന്ത്?

​മിസൈലുകൾ തകർക്കപ്പെടുമ്പോൾ ശബ്ദതരംഗങ്ങൾ താഴേക്ക് സഞ്ചരിക്കുന്നു. അന്തരീക്ഷത്തിൽ തടസ്സങ്ങൾ ഇല്ലാത്തതിനാൽ പ്രതിധ്വനി (Echo) വർദ്ധിക്കുകയും ശബ്ദം കൂടുതൽ ഉച്ചത്തിൽ കേൾക്കുകയും ചെയ്യുന്നു. ഇത് സ്ഫോടനം തൊട്ടടുത്താണെന്ന തോന്നൽ ഉണ്ടാക്കാം.

​4. ചില്ലുകൾക്കും ജനലുകൾക്കും അരികിൽ പോകരുത്

​മിസൈലുകൾ തകർക്കപ്പെടുമ്പോഴുണ്ടാകുന്ന മർദ്ദതരംഗങ്ങൾ ജനൽ ചില്ലുകൾ തകരാൻ കാരണമായേക്കാം. അതിനാൽ വലിയ ശബ്ദം കേൾക്കുമ്പോൾ ജനലുകൾക്കും തുറസ്സായ സ്ഥലങ്ങൾക്കും അരികിൽ നിൽക്കാതെ കെട്ടിടത്തിനുള്ളിൽ സുരക്ഷിതമായി തുടരുക.

​5. ലോഹാവശിഷ്ടങ്ങൾ (Shrapnel) അപകടകാരിയാണ്

​ആകാശത്തുവെച്ച് തകർക്കപ്പെടുന്ന മിസൈലുകളുടെ കഷ്ണങ്ങൾ താഴേക്ക് പതിക്കാൻ സാധ്യതയുണ്ട്. ഇവ അതീവ അപകടകാരിയും മാരകവുമാണ്. ഇത്തരം അവശിഷ്ടങ്ങൾ കാണാനിടയായാൽ ഒരിക്കലും അവയ്ക്ക് അരികിൽ പോകാനോ സ്പർശിക്കാനോ ഫോട്ടോ എടുക്കാനോ മുതിരരുത്.