ന്യൂഡൽഹി..​കോടതി പുറപ്പെടുവിക്കുന്ന ഇടക്കാല ഉത്തരവുകൾ ഒരാളുടെ അവകാശങ്ങളെ നേരിട്ട് ബാധിക്കുന്നുണ്ടെങ്കിൽ, ആ വ്യക്തി കേസിൽ കക്ഷിയല്ലെന്ന കാരണത്താൽ മാറ്റിനിർത്തരുതെന്ന് സുപ്രീം കോടതി വിധിച്ചു. നീതിപൂർവ്വമായ കേൾവി എന്ന തത്വം ഉയർത്തിപ്പിടിച്ചാണ് ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ച് ഈ നിർണ്ണായക ഉത്തരവ് പുറപ്പെടുവിച്ചത്. പഞ്ചാബ് ആൻഡ് ഹരിയാന ഹൈക്കോടതിയുടെ ഒരു ഉത്തരവ് മൂലം പ്രതിസന്ധിയിലായ എം/എസ് ചോപ്ര ഹോട്ടൽസ് പ്രൈവറ്റ് ലിമിറ്റഡ് സമർപ്പിച്ച അപ്പീലിലാണ് ഈ നിരീക്ഷണം.
​പഞ്ചാബ് യൂണിഫൈഡ് ബിൽഡിംഗ് റൂൾസ് (2025) സംബന്ധിച്ച തർക്കത്തിൽ ഹൈക്കോടതി നൽകിയ സ്റ്റേ ഉത്തരവ് കാരണം ചോപ്ര ഹോട്ടൽസിന്റെ ബിൽഡിംഗ് പ്ലാനുകൾ നിരസിക്കപ്പെടുകയും കെട്ടിടം പൊളിച്ചുനീക്കാൻ നോട്ടീസ് ലഭിക്കുകയും ചെയ്തിരുന്നു. കേസിൽ തങ്ങൾ കക്ഷികളല്ലെങ്കിലും ഉത്തരവ് തങ്ങളെ ദോഷകരമായി ബാധിക്കുന്നുവെന്നും അതിനാൽ കേസിൽ വാദമുന്നയിക്കാൻ അനുവദിക്കണമെന്നുമുള്ള കമ്പനിയുടെ ആവശ്യം ഹൈക്കോടതി തള്ളിയതാണ് സുപ്രീം കോടതിയിലെത്താൻ കാരണമായത്.
​കോടതി നടപടികളുടെ തുടക്കത്തിൽ ഭാഗമല്ലാത്ത ഒരാളാണെങ്കിൽ പോലും, കോടതിയുടെ ഉത്തരവ് ആ വ്യക്തിയുടെ സ്വത്തവകാശത്തെയോ മറ്റ് സിവിൽ അവകാശങ്ങളെയോ ബാധിക്കുന്നുണ്ടെങ്കിൽ അയാളെ കേൾക്കാൻ കോടതി ബാധ്യസ്ഥമാണെന്ന് സുപ്രീം കോടതി വ്യക്തമാക്കി. അത്തരം സാഹചര്യങ്ങളിൽ ആ വ്യക്തിയെ വെറുമൊരു അപരിചിതനായി കാണാൻ കഴിയില്ലെന്നും, കേസിൽ ഉചിതമായ കക്ഷിയായി അവരെ ഉൾപ്പെടുത്തേണ്ടത് നീതിനിർവ്വഹണത്തിന് അത്യാവശ്യമാണെന്നും കോടതി ചൂണ്ടിക്കാട്ടി. നടപടിക്രമങ്ങളേക്കാൾ പ്രധാനം സ്വാഭാവിക നീതിയാണെന്ന് ഓർമ്മിപ്പിച്ച കോടതി, കമ്പനിയെ കേസിൽ കക്ഷിയായി ചേർക്കാൻ ഉത്തരവിടുകയും ചെയ്തു.