​ദോഹ: ഖത്തറിലെ വാഹനങ്ങളുടെ നമ്പർ പ്ലേറ്റുകൾ ഏകീകൃതവും ആധുനികവുമായ പുതിയ ഡിസൈനിലേക്ക് മാറ്റുന്ന പദ്ധതിയുടെ രണ്ടാം ഘട്ടം ഏപ്രിൽ ഒന്നിന് ആരംഭിക്കും. ആഭ്യന്തര മന്ത്രാലയം (Ministry of Interior) നേരത്തെപ്രഖ്യാപിച്ചതനുസരിച്ച് സ്മാർട്ട് ട്രാഫിക് സംവിധാനങ്ങൾ കൂടുതൽ കാര്യക്ഷമമാക്കുന്നതിന്റെ ഭാഗമായാണ് ഈ നടപടി.ഏപ്രിൽ ഒന്നു മുതൽ പുതുതായി രജിസ്റ്റർ ചെയ്യുന്ന (New Registration) എല്ലാ സ്വകാര്യ വാഹനങ്ങൾക്കുമാണ് പുതിയ ഡിസൈനിലുള്ള പ്ലേറ്റുകൾ ലഭിക്കുക. നിലവിലെ ക്രമമനുസരിച്ച് 'Q', 'T' അല്ലെങ്കിൽ 'R' എന്നീ അക്ഷരങ്ങളിൽ ഒന്നായിരിക്കും ഈ പ്ലേറ്റുകളിൽ രേഖപ്പെടുത്തുക.പദ്ധതിയുടെ ആദ്യഘട്ടം കഴിഞ്ഞ ഡിസംബറിൽ പൂർത്തിയായിരുന്നു. 'Som' ആപ്പ് വഴി പ്രത്യേക നമ്പറുകൾ (Distinguished Numbers) സ്വന്തമാക്കിയവർക്കാണ് അന്ന് 'Q' അക്ഷരത്തോടു കൂടിയ പ്ലേറ്റുകൾ നൽകിയത്. മൂന്നാം ഘട്ടത്തിൽ നിലവിൽ റോഡുകളിലുള്ള എല്ലാ സ്വകാര്യ വാഹനങ്ങളുടെയും പ്ലേറ്റുകൾ പുതിയ ഡിസൈനിലേക്ക് മാറ്റും. ഇതിനായുള്ള സമയക്രമം മന്ത്രാലയം പിന്നീട് പ്രഖ്യാപിക്കും.നിലവിലുള്ള വാഹന ഉടമകൾ ശ്രദ്ധിക്കാൻ:
നിലവിൽ വാഹനമുള്ളവർ പ്ലേറ്റുകൾ മാറ്റാൻ ഇപ്പോൾ തിരക്ക് കൂട്ടേണ്ടതില്ലെന്ന് അധികൃതർ അറിയിച്ചു. മൂന്നാം ഘട്ടത്തിനായുള്ള ഔദ്യോഗിക അറിയിപ്പ് വരുന്നത് വരെ നിലവിലുള്ള പ്ലേറ്റുകൾ തന്നെ ഉപയോഗിക്കാം. ലൈസൻസ് പുതുക്കുമ്പോഴോ പ്ലേറ്റുകൾക്ക് കേടുപാടുകൾ സംഭവിക്കുമ്പോഴോ നിലവിലെ രീതിയിൽ തന്നെ തുടരാവുന്നതാണ്.വെറുമൊരു സൗന്ദര്യവൽക്കരണമല്ല ഈ മാറ്റത്തിന് പിന്നിലെ ലക്ഷ്യം. അത്യാധുനിക ഡിജിറ്റൽ സാങ്കേതികവിദ്യ ഉപയോഗിച്ച് പ്രവർത്തിക്കുന്ന ട്രാഫിക് ക്യാമറകൾക്കും സ്മാർട്ട് സിസ്റ്റങ്ങൾക്കും നമ്പർ പ്ലേറ്റുകൾ വേഗത്തിലും കൃത്യമായും വായിച്ചെടുക്കാൻ പുതിയ ഡിസൈൻ സഹായകമാകും. വാണിജ്യ വാഹനങ്ങൾക്കും മറ്റുമായി രണ്ട് അക്ഷരങ്ങളുള്ള പ്ലേറ്റുകൾ പിൽക്കാലത്ത് അവതരിപ്പിക്കുമെന്നും മന്ത്രാലയം വ്യക്തമാക്കിയിട്ടുണ്ട്.