ദോഹ:  ഖത്തർ ബോട്ട് ഷോയിൽ നേടിയ മികച്ച വിജയത്തെ തുടർന്ന് വരാനിരിക്കുന്ന എല്ലാ പ്രധാന ഇവന്റുകൾക്കും  സമുദ്ര ഗതാഗത സേവനം ഓൾഡ് ദോഹ പോർട്ട് ആരംഭിച്ചതായി അധികൃതർ അറിയിച്ചു. പോർട്ടിലെ സേവന ഗുണമേന്മ ഉയർത്തുന്നതിനായുള്ള പദ്ധതികളുടെ ഭാഗമായാണ് തീരുമാനമെന്ന് പ്രസ്താവനയിൽ വ്യക്തമാക്കി.
പുതിയ മാരിടൈം സർവീസിന്റെ ലക്ഷ്യം സന്ദർശകർക്കുള്ള സൗകര്യം വർധിപ്പിക്കുകയും പോർട്ടിലെത്തുന്ന പ്രക്രിയ കൂടുതൽ സുഗമമാക്കുകയും ചെയ്യുന്നതാണ്. റിക്സോസ് ഗൾഫ് ഹോട്ടൽ, പേൾ ഐലൻഡ് എന്നീ രണ്ട് സ്ഥലങ്ങളിൽ നിന്ന് നേരിട്ട് ഓൾഡ് ദോഹ പോർട്ടിലേക്കുള്ള യാത്ര ഇപ്പോള്‍ സുഗമമാണ്. സന്ദർശകർക്കൊരു സുഖകരവും വ്യത്യസ്തതയാർന്നതുമായ അനുഭവം നൽകുന്നതിനുള്ള വകുപ്പുകളുടെ ഫലപ്രദമായ സഹകരണത്തിന്റെ തെളിവാണിതെന്ന് അധികൃതർ വ്യക്തമാക്കി.
നാല് ദിവസം നീണ്ടുനിന്ന ഖത്തർ ബോട്ട് ഷോയിൽ 1,500-ത്തിലധികം യാത്രക്കാർ ഈ സമുദ്ര ഗതാഗത സംവിധാനം ഉപയോഗിച്ചതായി പോർട്ട് അറിയിച്ചു. പ്രദർശനത്തിലെ പ്രധാന ആകർഷണങ്ങളിലൊന്നായി സന്ദർശകർ ഈ സേവനത്തെ വിലയിരുത്തി.
ഓൾഡ് ദോഹ പോർട്ടിനെ ലോകോത്തര സമുദ്ര ഗമന-സഞ്ചാര കേന്ദ്രമായി ഉയർത്തുന്നതിനുള്ള നിർണായക ചുവടുവയ്പ്പാണ് ഈ പദ്ധതി. ഖത്തറിന്റെ പരമ്പരാഗത സമുദ്ര പൈതൃകം ആധുനിക രാജ്യത്തിന്റെ സമകാലീന മുഖവുമായി സംയോജിപ്പിക്കുന്നതിൽ ഈ സേവനം വലിയ പങ്കുവഹിക്കുമെന്നാണ് വിലയിരുത്തൽ.
 സന്ദർശകർക്ക് കൂടുതൽ നവീനവും മുന്നേറ്റവുമായ സേവനങ്ങൾ നൽകുന്നതിലാണ് ഞങ്ങളുടെ ദൃശ്യം. രാജ്യത്തെ മാരിടൈം, ടൂറിസം മേഖലകളെ ശക്തിപ്പെടുത്തുകയാണ് ലക്ഷ്യമെന്ന്ഓൾഡ് ദോഹ പോർട്ട് സി.ഇ.ഒ. എൻജിനീർ മുഹമ്മദ് അബ്ദുല്ല അൽ മുല്ല പറഞ്ഞു.
ഗതാഗത സേവനം നേടിയ വിജയത്തെ തുടർന്നാണ് ഇതിനെ സ്ഥിരം സേവനമാക്കാൻ തീരുമാനിച്ചത്. കൂടാതെ, സമുദ്ര ഗതാഗതം കൂടുതൽ മെച്ചപ്പെടുത്തുന്നതിനായി ഒരു സ്പെഷ്യലൈസ്ഡ് ഓപ്പറേറ്ററെ നിയമിക്കുന്നതിനുള്ള ഔദ്യോഗിക ടെൻഡർ പോർട്ട് ഉടൻ ക്ഷണിക്കും.
2025–2026 ഇവന്റ് കലണ്ടർ പ്രഖ്യാപനത്തിന്റെ ഭാഗമായി സേവനം വിപുലപ്പെടുത്തുന്നത് ഓൾഡ് ദോഹ പോർട്ടിന്റെ വളർച്ചാപഥത്തിലെ മറ്റൊരു വലിയ നേട്ടമെന്ന് അധികൃതർ വ്യക്തമാക്കി.