ന്യൂഡൽഹി: രാജ്യത്ത് ആറ് പുതിയ ഗവർണർമാരെ നിയമിച്ചുകൊണ്ട് രാഷ്ട്രപതി ദ്രൗപദി മുർമു ഉത്തരവിറക്കി. ഇതിൽ സിക്കിം ഗവർണറായിരുന്ന ഓംപ്രകാശ് മാഥൂറിനെ കേരളത്തിന്റെ പുതിയ ഗവർണറായി നിയമിച്ചു. ഇതുവരെ കേരളത്തിന്റെ അധിക ചുമതല വഹിച്ചിരുന്ന രാജേന്ദ്ര വിശ്വനാഥ് ആർലേക്കറിന് തമിഴ്നാടിന്റെ പൂർണ്ണ ചുമതല നൽകി. ആർ.എൻ. രവി ബംഗാൾ ഗവർണറായതിനെ തുടർന്ന് കഴിഞ്ഞ മാർച്ച് മുതൽ ആർലേക്കറായിരുന്നു തമിഴ്നാടിന്റെ ചുമതലയും നിർവഹിച്ചിരുന്നത്.
മുൻ ആർ.എസ്.എസ് പ്രചാരകനും മുതിർന്ന ബി.ജെ.പി നേതാവും മുൻ രാജ്യസഭാംഗവുമായ ഓംപ്രകാശ് മാഥൂർ, രാജസ്ഥാനിലെ പാലി ജില്ലയിൽ 1952 ജനുവരി 2നാണ് ജനിച്ചത്. 2008-09 കാലഘട്ടത്തിൽ ബി.ജെ.പിയുടെ രാജസ്ഥാൻ സംസ്ഥാന അധ്യക്ഷനായിരുന്ന അദ്ദേഹം, 2024 ജൂലൈ 3 മുതൽ സിക്കിം ഗവർണറായി സേവനം അനുഷ്ഠിച്ചു വരികയായിരുന്നു.
മറ്റു പ്രധാന നിയമനങ്ങൾ:
സിക്കിം ഗവർണർ: ബി.ജെ.പി മുൻ ദേശീയ ജനറൽ സെക്രട്ടറിയും രാജ്യസഭാ എം.പിയുമായ ദുഷ്യന്ത് ഗൗതം.
കർണാടക ഗവർണർ: ഹരിയാനയിൽ നിന്നുള്ള മുൻ എം.പി ഡോ. സുധ യാദവ്.
ഒഡിഷ ഗവർണർ: ജാർഖണ്ഡ് മുൻ എം.പി ബ്രജ്മോഹൻ റാം.
ഉത്തരാഖണ്ഡ് ഗവർണർ: മധ്യപ്രദേശിൽ നിന്നുള്ള ബി.ജെ.പി നേതാവ് ഡോ. ധൽ സിംഗ് ബിസേൻ.
നിലവിലെ ഗവർണർമാരായ തവാർചന്ദ് ഗെഹ്‌ലോട്ട് (കർണാടക), കംഭംപതി (ഒഡിഷ), ഗുർമീത് സിംഗ് (ഉത്തരാഖണ്ഡ്) എന്നിവർക്ക് പുതിയ പദവികൾ നൽകിയിട്ടില്ല.
