ദോഹ: ഖത്തറിന്റെ ദേശീയ സുരക്ഷയും അടിയന്തര സാഹചര്യങ്ങളെ നേരിടാനുള്ള സജ്ജീകരണങ്ങളും ഉറപ്പുവരുത്തുന്നതിനായി സംഘടിപ്പിച്ച ആറാമത് 'വതൻ 2026' ദേശീയ സുരക്ഷാ അഭ്യാസം വിജയകരമായി സമാപിച്ചു. സൈനിക, സുരക്ഷാ, സിവിലിയൻ മേഖലകളിൽ നിന്നായി എൺപതോളം സ്ഥാപനങ്ങളെ പ്രതിനിധീകരിച്ച് 25,000-ത്തിലധികം പേർ അഭ്യാസത്തിൽ പങ്കാളികളായി. ആഭ്യന്തര മന്ത്രിയും അന്താരാഷ്ട്ര സുരക്ഷാ സേന (ലഖ്‌വിയ) കമാൻഡറുമായ ശൈഖ് ഖലീഫ ബിൻ ഹമദ് ബിൻ ഖലീഫ അൽ ഥാനിയാണ് അഭ്യാസത്തിന്റെ സമാപനം പ്രഖ്യാപിച്ചത്.
വിവിധ സർക്കാർ-സ്വകാര്യ സ്ഥാപനങ്ങൾ തമ്മിലുള്ള ഏകോപനവും ദ്രുത പ്രതികരണ ശേഷിയും പരിശോധിക്കുന്നതിനായി ഫ്രഞ്ച് സുരക്ഷാ സേനയും ഇത്തവണ ഖത്തർ സേനയോടൊപ്പം അഭ്യാസത്തിൽ പങ്കെടുത്തു. ഒക്ടോബർ 25-ന് ആരംഭിച്ച തിയററ്റിക്കൽ (Tabletop) പരിശീലനങ്ങൾക്കു ശേഷമാണ് വിവിധ പ്രായോഗിക സാഹചര്യങ്ങൾ മുൻനിർത്തിയുള്ള ഫീൽഡ് അഭ്യാസങ്ങളിലേക്ക് കടന്നത്.
രാജ്യത്തിന്റെ സുരക്ഷയും വിഭവങ്ങളും സംരക്ഷിക്കുന്നതിൽ വിവിധ സ്ഥാപനങ്ങൾ വെച്ചുപുലർത്തുന്ന മികച്ച ഏകോപനവും പങ്കെടുത്തവരുടെ ഉയർന്ന കാര്യക്ഷമതയുമാണ് ഈ അഭ്യാസത്തിലൂടെ വ്യക്തമായതെന്ന് ശൈഖ് ഖലീഫ ബിൻ ഹമദ് പറഞ്ഞു. ഏത് അടിയന്തര സാഹചര്യത്തെയും നേരിടാൻ ഖത്തർ പൂർണ്ണ സജ്ജമാണെന്ന് ഉറപ്പുവരുത്താൻ ഇത്തരം വാർഷിക അഭ്യാസങ്ങൾ സഹായിക്കുന്നു.
