മുവാറ്റുപുഴയുടെ നഗരഹൃദയത്തിലൂടെ ഒഴുകുന്ന പുഴയ്ക്ക് കുറുകെ പുതിയൊരു നടപ്പുവഴി കൂടി പിറവിയെടുക്കുകയാണ്. നീണ്ട നാളത്തെ കാത്തിരിപ്പിനൊടുവിൽ മൂവാറ്റുപുഴയുടെ അഭിമാനമായ തൂക്കുപാലത്തിന്റെ പണികൾ അന്തിമ ഘട്ടത്തിലേക്ക് കടന്നിരിക്കുന്നു. നഗരത്തിന്റെ മുഖച്ഛായ മാറ്റാൻ ലക്ഷ്യമിട്ടുള്ള പുഴയോര ടൂറിസം പദ്ധതിയുടെ ഏറ്റവും ആകർഷകമായ ഏടുകളിലൊന്നാണിത്. ഈ വർഷം തന്നെ പാലം പൊതുജനങ്ങൾക്കായി തുറന്നുകൊടുക്കാനാകുമെന്ന പ്രതീക്ഷയിലാണ് അധികൃതർ.

നഗരസഭയുടെ നേതൃത്വത്തിൽ 13 കോടി രൂപ മുതൽമുടക്കിൽ രണ്ട് ഘട്ടങ്ങളായാണ് ഈ ബൃഹത്തായ വികസന പദ്ധതി നടപ്പാക്കുന്നത്. ഇതിൽ ആദ്യപടിയായി, കേന്ദ്ര സർക്കാരിന്റെ അമൃതം പദ്ധതിയിൽ ഉൾപ്പെടുത്തി അനുവദിച്ച അഞ്ച് കോടി രൂപ ചെലവഴിച്ചാണ് തൊടുപുഴയാറിന് കുറുകെ തൂക്കുപാലം പണികഴിച്ചിരിക്കുന്നത്. നഗരവാസികൾക്കും സഞ്ചാരികൾക്കും സുപരിചിതമായ ഡ്രീംലാൻഡ് പാർക്കിൽ നിന്നും പുഴ കടന്ന് പേട്ട ഭാഗത്തേക്ക് എത്തിച്ചേരുന്ന തരത്തിലാണ് പാലത്തിൻ്റെ ഘടന. നിലവിലുള്ള 'ലതാ' പാലത്തിന് തൊട്ടുസമാന്തരമായാണ് പുതിയ യാത്രാമാർഗ്ഗം യാഥാർത്ഥ്യമായിരിക്കുന്നത്

വിനോദസഞ്ചാര ഭൂപടത്തിൽ മൂവാറ്റുപുഴയ്ക്ക് പുതിയൊരു മേൽവിലാസം നൽകാൻ പോന്നതാണ് പദ്ധതിയുടെ രണ്ടാം ഘട്ടം. കച്ചേരിത്താഴം വരെ നീളുന്ന മനോഹരമായ പുഴയോര നടപ്പാത, കാഴ്ചകൾ കാണാൻ വാച്ച് ടവർ, ചരിത്രവും സംസ്കാരവും ഒപ്പിയെടുക്കാൻ മ്യൂസിയം, സായാഹ്നങ്ങൾ ആസ്വദിക്കാൻ കഫെറ്റീരിയ എന്നിവയെല്ലാം പദ്ധതിയുടെ ഭാഗമായി വരുന്നുണ്ട്. ഒപ്പം, പുഴയിലൂടെയുള്ള ജലയാത്ര സഞ്ചാരികൾക്ക് സമ്മാനിക്കാനായി സോളാർ ബോട്ടുകളും സജ്ജമാക്കാൻ പദ്ധതിയുണ്ട്.

പ്രകൃതിയോട് ഇണങ്ങിനിന്നുകൊണ്ടുള്ള നിർമ്മാണ ശൈലിയാണ് പദ്ധതിയുടെ മറ്റൊരു പ്രത്യേകത. ഇവിടുത്തെ സ്വാഭാവികമായ പാറക്കെട്ടുകളും മുളങ്കാടുകളും ചെറിയ കുന്നുകളുമൊന്നും നശിപ്പിക്കാതെയാണ് നാലര ഏക്കറിലധികം പരന്നുകിടക്കുന്ന ഡ്രീം ലാൻഡ് പാർക്ക് 50 ലക്ഷം രൂപ ചെലവിൽ നവീകരിക്കുന്നത്. തൂക്കുപാലത്തിന്റെ യാഥാർത്ഥ്യമാക്കൽ കൂടി പൂർത്തിയാകുന്നതോടെ, മൂവാറ്റുപുഴയാറിന്റെ സൗന്ദര്യം അതിന്റെ മുഴുവൻ തനിമയിലും അടുത്തറിഞ്ഞ് ആസ്വദിക്കാനുള്ള അവസരമാണ് സഞ്ചാരികൾക്ക് മുന്നിൽ തുറക്കപ്പെടുന്നത്.

Photo Courtesy - Google