സിനിമാസ്വാദകരുടെയും സുഹൃത്തുകളുടെയും സ്നേഹത്തിനും ആശംസകൾക്കും നടൻ മോഹൻലാൽ നന്ദി പറഞ്ഞു. 65-ാം പിറന്നാൾ ലളിതമായി ആഘോഷിച്ച അദ്ദേഹം, എമ്പുരാൻ, തുടരും എന്നീ ഹിറ്റ് സിനിമകളുടെ സന്തോഷവും പങ്കുവച്ചു.
സുഹൃത്തും നിർമ്മാതാവുമായ ആന്റണി പെരുമ്പാവൂരിന്റെ വീട്ടിലായിരുന്നു കേക്ക് മുറിച്ച് നടന്ന ചെറിയ ആഘോഷം. ആന്റണിയുടെ ഭാര്യ ശാന്തി, മക്കൾ ആശിഷ്, അനിഷ്, അനിഷിന്റെ ഭർത്താവിന്റെ മാതാപിതാക്കളായ ഡോ. വിൻസെന്റും സിന്ധുവും പങ്കെടുത്തു. ആഘോഷത്തിന്റെ ചിത്രങ്ങൾ ആന്റണി സാമൂഹ്യമാധ്യമങ്ങളിൽ പങ്കുവച്ചു.
മമ്മൂട്ടി, ശോഭന, പൃഥ്വിരാജ്, മുകേഷ്, ഹണി റോസ് തുടങ്ങിയ താരങ്ങളും സംവിധായകരും മറ്റു കലാകാരന്മാരും രാഷ്ട്രീയ-സാമൂഹിക പ്രവർത്തകരും മോഹൻലാലിന് ആശംസകളുമായി എത്തി. ആരാധകരുടെ സംഘടനകൾ പല ദാനപരിപാടികളും നടത്തി.
‘ഉണ്ണികളേ ഒരു കഥ പറയാം’ എന്ന സിനിമയിലെ നായിക കാർത്തികയും ബാലതാരങ്ങളും മോഹൻലാലിന് ആശംസകൾ നേർന്നു. യദു കൃഷ്ണൻ, വിധു കൃഷ്ണൻ, വിമൽ, ബോബൻ, പ്രശോഭ്, ചൈതന്യ, അഭിജിത്, സ്വപ്ന, വിദ്യ എന്നിവർ ഓൺലൈനിലൂടെ അനുഗമിച്ചു.
സിനിമയിൽ 47 വർഷം പൂര്ത്തിയാകുന്ന ഈ ഡിസംബർ 25-ന് തന്റെ ജീവിതകഥ പ്രസിദ്ധീകരിക്കുമെന്ന് മോഹൻലാൽ അറിയിച്ചു. ‘മുഖരാഗം’ എന്ന പേരിലാണ് ഭാനുപ്രകാശ് രചിച്ച ഈ പുസ്തകം പുറത്തിറങ്ങുന്നത്. അവതാരിക എഴുതിയിരിക്കുന്നത് എം.ടി. വാസുദേവൻ നായരാണ്.
ഉടൻ തിയേറ്ററുകളിലെത്താനിരിക്കുന്ന ‘കണ്ണപ്പ’ സിനിമയുടെ പുതിയ ഫോട്ടോകളും അണിയറപ്രവർത്തകർ പുറത്തുവിട്ടു. സത്യൻ അന്തിക്കാട് സംവിധാനം ചെയ്യുന്ന ‘ഹൃദയപൂർവം’ സിനിമയുടെ ചിത്രീകരണം പൂർത്തിയായിട്ടുണ്ട്.
