​ദോഹ: പ്രാദേശികമായി നിലനിൽക്കുന്ന സങ്കീർണ്ണ സാഹചര്യങ്ങൾക്കിടയിൽ ജനങ്ങൾ അനുഭവിക്കുന്ന മാനസിക സമ്മർദ്ദത്തെ മറികടക്കാൻ കൃത്യമായ ദിനചര്യകളും സാമൂഹിക പിന്തുണയും അത്യാവശ്യമാണെന്ന് പ്രമുഖ ക്ലിനിക്കൽ സൈക്കോളജിസ്റ്റും 'സുകൂൻ ക്ലിനിക്കിന്റെ' സ്ഥാപകനുമായ ഡോ. നായിഫ് അൽ മുതവ്വ പറഞ്ഞു. നിലവിലെ സാഹചര്യങ്ങളിൽ പലരിലും പ്രകടമാകുന്ന ശാരീരികവും മാനസികവുമായ മാറ്റങ്ങൾ അനിശ്ചിതത്വത്തോടുള്ള സ്വാഭാവികമായ പ്രതികരണമാണെന്ന് അദ്ദേഹം വ്യക്തമാക്കി.
ഉത്കണ്ഠ, ഉറക്കമില്ലായ്മ, കാര്യങ്ങളിൽ ശ്രദ്ധ കേന്ദ്രീകരിക്കാനുള്ള ബുദ്ധിമുട്ട് എന്നിവ ഇത്തരം സാഹചര്യങ്ങളിൽ മനുഷ്യസഹജമാണ്. തങ്ങൾ സുരക്ഷിതരായിരിക്കുമ്പോൾ മറ്റുള്ളവർ ദുരിതമനുഭവിക്കുന്നതിലുള്ള കുറ്റബോധം (Survivor’s guilt) ചിലരിൽ ഉണ്ടായേക്കാം. ഇതൊന്നും ബലഹീനതയല്ല, മറിച്ച് മനസ്സിന്റെ സ്വാഭാവിക പ്രതികരണമാണെന്ന് അദ്ദേഹം ഓർമ്മിപ്പിച്ചു.
ചുറ്റുമുള്ള കാര്യങ്ങൾ അപ്രതീക്ഷിതമായി മാറുമ്പോൾ, കൃത്യസമയത്ത് ഉണരുക, ഭക്ഷണം കഴിക്കുക തുടങ്ങിയ ലളിതമായ ദിനചര്യകൾ മനസ്സിന് വലിയൊരു ആശ്വാസം നൽകും. ഇത് മാനസിക നില സുസ്ഥിരമായി നിലനിർത്താൻ സഹായിക്കും.സോഷ്യൽ മീഡിയയുടെയും വാർത്തകളുടെയും അമിത ഉപയോഗം 'സൈക്കോളജിക്കൽ ഫ്ലഡിംഗ്' (Psychological flooding) എന്ന അവസ്ഥയിലേക്ക് നയിക്കാം. വിശ്വസനീയമായ സ്രോതസ്സുകളിൽ നിന്ന് മാത്രം നിശ്ചിത സമയങ്ങളിൽ വിവരങ്ങൾ തേടുക. വാർത്തകളിൽ നിന്ന് വിട്ടുനിൽക്കുന്നത് ഒളിച്ചോട്ടമല്ല, മറിച്ച് സ്വയം നിയന്ത്രിക്കാനുള്ള മാർഗ്ഗമാണ്.ഒറ്റപ്പെട്ട നിലയിലല്ല, മറിച്ച് കൂട്ടായ്മകളിലൂടെ സമ്മർദ്ദത്തെ നേരിടുക. പ്രാർത്ഥനയും ധ്യാനവും ഇത്തരം ഘട്ടങ്ങളിൽ മാനസികമായ കരുത്ത് നൽകും.