ജ്യോതിഷത്തിൽ ധൈര്യം, ആത്മവിശ്വാസം, ഊർജം, നേതൃത്വം, പ്രവർത്തനശേഷി എന്നിവയുടെ പ്രതീകമായാണ് ചൊവ്വയെ കണക്കാക്കുന്നത്. സേനാപതിയുടെ സ്ഥാനമാണ് ജ്യോതിഷത്തിൽ ചൊവ്വയ്ക്കുള്ളത്. ദേവസൈനാധിപനായ സുബ്രഹ്മണ്യനാണ് ചൊവ്വയുടെ ദേവതയെന്നാണ് വിശ്വാസം. ചൊവ്വയെ ദേവീസങ്കൽപ്പത്തിൽ ഭദ്രകാളിയായും കണക്കാക്കാറുണ്ട്. അതുകൊണ്ടുതന്നെ ചൊവ്വയുടെ രാശിമാറ്റത്തിന് ജ്യോതിഷത്തിൽ പ്രത്യേക പ്രാധാന്യമുണ്ട്.

നവംബർ 12ന് ചൊവ്വ കർക്കടക രാശിയിൽനിന്ന് ചിങ്ങം രാശിയിലേക്ക് പ്രവേശിക്കുമെന്നാണ് ജ്യോതിഷ പ്രവചനം. 2027 മാർച്ച് 9 വരെ ചൊവ്വ ചിങ്ങം രാശിയിൽ തുടരുമെന്നും കണക്കാക്കപ്പെടുന്നു. ഈ ഗ്രഹമാറ്റം ചില രാശിക്കാർക്ക് തൊഴിൽ, വ്യാപാരം, സാമ്പത്തികം തുടങ്ങിയ മേഖലകളിൽ അനുകൂലമായ മാറ്റങ്ങൾ കൊണ്ടുവരുമെന്നാണ് ജ്യോതിഷ വിശ്വാസം. പുതിയ അവസരങ്ങൾ തേടുന്നതിനും മുടങ്ങിക്കിടക്കുന്ന കാര്യങ്ങൾ മുന്നോട്ടുകൊണ്ടുപോകുന്നതിനും ഈ കാലയളവ് സഹായകമാകുമെന്നാണ് പ്രവചനം.

മേടം:  ചൊവ്വയുടെ രാശിമാറ്റം മേടം രാശിക്കാർക്ക് ആത്മവിശ്വാസവും പ്രവർത്തനമികവും പ്രകടിപ്പിക്കാൻ അവസരമൊരുക്കുമെന്നാണ് ജ്യോതിഷഫലം. ജോലിയിൽ പുതിയ ചുമതലകൾ ലഭിക്കാനും ഏറെക്കാലമായി പരിശ്രമിക്കുന്ന കാര്യങ്ങളിൽ പുരോഗതിയുണ്ടാകാനും സാധ്യതയുണ്ട്. വ്യാപാരരംഗത്തുള്ളവർക്ക് പുതിയ പദ്ധതികൾ ആവിഷ്കരിക്കാനും അവസരങ്ങൾ പ്രയോജനപ്പെടുത്താനും കഴിഞ്ഞേക്കും. അതേസമയം, വലിയ നിക്ഷേപങ്ങളും സാമ്പത്തിക തീരുമാനങ്ങളും എടുക്കുമ്പോൾ കൂടുതൽ ജാഗ്രത പുലർത്തണം.

ചിങ്ങം: ചൊവ്വ ചിങ്ങം രാശിയിലേക്ക് പ്രവേശിക്കുന്നതിനാൽ ഈ രാശിക്കാർക്ക് ഗ്രഹമാറ്റം ഏറെ പ്രാധാന്യമുള്ളതായാണ് ജ്യോതിഷം വിലയിരുത്തുന്നത്. ആത്മവിശ്വാസം വർധിക്കാനും നേതൃത്വഗുണങ്ങൾ പ്രകടിപ്പിക്കാനും അവസരങ്ങൾ ലഭിച്ചേക്കാം. തൊഴിൽമേഖലയിൽ കഴിവ് തെളിയിക്കാനും പുതിയ ഉത്തരവാദിത്വങ്ങൾ ഏറ്റെടുക്കാനും സാധിക്കുമെന്നാണ് പ്രവചനം. വ്യാപാരികൾക്ക് പുതിയ ബന്ധങ്ങളിലൂടെ നേട്ടമുണ്ടാക്കാനുള്ള സാധ്യതയുമുണ്ട്. കുടുംബത്തിലെ അഭിപ്രായവ്യത്യാസങ്ങൾ ചർച്ചകളിലൂടെ പരിഹരിക്കാനും കഴിഞ്ഞേക്കാം.

വൃശ്ചികം: ചൊവ്വ വൃശ്ചികം രാശിയുടെ അധിപനായതിനാൽ ഈ രാശിക്കാർക്കും ഗ്രഹത്തിന്റെ മാറ്റം സവിശേഷമാണെന്നാണ് ജ്യോതിഷ വിശ്വാസം. ജോലിയിലും വ്യാപാരത്തിലും പുരോഗതി നേടാനുള്ള അവസരങ്ങൾ ലഭിച്ചേക്കാം. വരുമാനം വർധിപ്പിക്കുന്നതിനായി പുതിയ മാർഗങ്ങൾ കണ്ടെത്താനും നേരത്തേ മുടങ്ങിക്കിടന്ന ജോലികൾ പൂർത്തിയാക്കാനും സാധിക്കുമെന്നാണ് പ്രവചനം. സാമ്പത്തിക നേട്ടങ്ങൾ ലക്ഷ്യമിട്ട് മുന്നോട്ടുപോകുമ്പോൾ തീരുമാനങ്ങൾ കൃത്യമായി വിലയിരുത്തുന്നത് ഗുണകരമാകും.

കുംഭം: ചൊവ്വയുടെ രാശിമാറ്റം കുംഭം രാശിക്കാർക്ക് ജോലിയിലും സാമ്പത്തിക കാര്യങ്ങളിലും കൂടുതൽ ശ്രദ്ധ ആവശ്യപ്പെടുന്ന കാലമായിരിക്കുമെന്നാണ് ജ്യോതിഷഫലം. കഠിനാധ്വാനവും അച്ചടക്കത്തോടെയുള്ള പ്രവർത്തനവും നേട്ടങ്ങൾക്ക് വഴിയൊരുക്കിയേക്കാം. ജോലിയിൽ പുതിയ ചുമതലകൾ ലഭിക്കാനും വ്യാപാരത്തിൽ പങ്കാളിത്ത സാധ്യതകൾ തുറക്കാനും ഇടയുണ്ട്. അനാവശ്യ ചെലവുകൾ നിയന്ത്രിക്കുന്നത് സാമ്പത്തിക സ്ഥിതി മെച്ചപ്പെടുത്താൻ സഹായിക്കും. തർക്കങ്ങളിൽപ്പെട്ട ഭൂമിയോ പണമോ തിരികെ ലഭിക്കാനുള്ള സാധ്യതയുണ്ടെന്നും ജ്യോതിഷ പ്രവചനങ്ങൾ സൂചിപ്പിക്കുന്നു.