തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പിൽ ഭരണ മുന്നണിയായ എൽഡിഎഫിനെ ഞെട്ടിച്ച് വൻ മുന്നേറ്റം സ്വന്തമാക്കി യുഡിഎഫ് . രാഷ്ട്രീയ ശക്തിയുടെ അളവുകോലായി കണക്കാക്കപ്പെടുന്ന ജില്ലാ പഞ്ചായത്ത്, കോർപ്പറേഷൻ, മുനിസിപ്പാലിറ്റി തലങ്ങളിലെ വോട്ടുകൾ അടിസ്ഥാനമാക്കി നടത്തിയ വിശകലനത്തിൽ, എൽഡിഎഫിനെക്കാൾ ഏകദേശം ഏഴര ലക്ഷം വോട്ടുകൾക്ക് യുഡിഎഫ് മുന്നിലെത്തി. വോട്ടിംഗ് ശതമാനത്തിൽ ഇത് മൂന്നര ശതമാനത്തിന്റെ (3.5%) ലീഡാണ്.
കണക്കിലെ മുന്നേറ്റം:
2020-ൽ നിന്ന് 2025-ലേക്ക്
കഴിഞ്ഞ 2020-ലെ തദ്ദേശ തിരഞ്ഞെടുപ്പിൽ യുഡിഎഫിനെക്കാൾ 5.40 ലക്ഷം വോട്ടിന്റെ ഭൂരിപക്ഷം നേടിയിരുന്ന എൽഡിഎഫിന് ഇത്തവണ വലിയ തിരിച്ചടിയാണ് നേരിട്ടത്. ഈ തിരഞ്ഞെടുപ്പിൽ യുഡിഎഫ് 89.69 ലക്ഷം വോട്ടുകൾ നേടിയപ്പോൾ എൽഡിഎഫിന് ലഭിച്ചത് 82.16 ലക്ഷം വോട്ടുകളാണ്.
യുഡിഎഫ്: 2020-ൽ 79.07 ലക്ഷം വോട്ട്. ഇത്തവണ 89.69 ലക്ഷം വോട്ട്. 10.62 ലക്ഷം വോട്ടിന്റെ വർദ്ധനവ്.
എൽഡിഎഫ്: 2020-ൽ 84.48 ലക്ഷം വോട്ട്. ഇത്തവണ 82.16 ലക്ഷം വോട്ട്. 2.32 ലക്ഷം വോട്ടിന്റെ കുറവ്.
എൻഡിഎയുടെ വോട്ട് വിഹിതത്തിലും നേരിയ വർദ്ധനവുണ്ടായി. കഴിഞ്ഞ തവണത്തെ 31.65 ലക്ഷം വോട്ടിൽ നിന്ന് ഇക്കുറി 32.17 ലക്ഷം വോട്ടായി വർദ്ധിച്ചു.
ജില്ലാതല ചിത്രം: യുഡിഎഫ് ആധിപത്യം
സംസ്ഥാനത്തെ ഭൂരിഭാഗം ജില്ലകളിലും യുഡിഎഫ് വോട്ട് വിഹിതത്തിൽ മുന്നേറ്റമുണ്ടാക്കി.മുന്നിലെത്തിയ മുന്നണി ജില്ലകൾ
യുഡിഎഫ് പത്തനംതിട്ട, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കാസർകോട്
എൽഡിഎഫ് തിരുവനന്തപുരം, കൊല്ലം, ആലപ്പുഴ, തൃശൂർ, പാലക്കാട്, കണ്ണൂർ
