​ന്യൂഡൽഹി: ആർട്ടിഫിഷ്യൽ ഇന്റലിജൻസ് (AI) പോലുള്ള അത്യാധുനിക സാങ്കേതികവിദ്യകൾക്ക് നിയമകലാലയങ്ങൾ കർശനമായ നിരോധനം ഏർപ്പെടുത്തരുതെന്ന് ചീഫ് ജസ്റ്റിസ് ഓഫ് ഇന്ത്യ ജസ്റ്റിസ് സൂര്യകാന്ത്. സാങ്കേതികവിദ്യ നിയമരംഗത്തിന്റെ അവിഭാജ്യ ഘട്ടമായി മാറിക്കൊണ്ടിരിക്കുന്ന കാലത്ത്, ഭാവിയിലെ അഭിഭാഷകരെ അവ ഉത്തരവാദിത്തത്തോടും കൃത്യതയോടും കൂടി ഉപയോഗിക്കാൻ പരിശീലിപ്പിക്കുകയാണ് വേണ്ടതെന്ന് അദ്ദേഹം വ്യക്തമാക്കി.
​ജോധ്പൂർ നാഷണൽ ലോ യൂണിവേഴ്സിറ്റിയുടെ ആഭിമുഖ്യത്തിൽ സംഘടിപ്പിച്ച വൈസ് ചാൻസലർമാരുടെ രണ്ടാമത് സംഗമത്തിൽ സംസാരിക്കുകയായിരുന്നു അദ്ദേഹം.
 എഐ അമിതമായി ആശ്രയിക്കുന്നത് വിദ്യാർത്ഥികളുടെ സ്വതന്ത്ര ചിന്താശേഷിയെ ബാധിക്കുമെന്ന ആശങ്ക നിലവിലുണ്ടെങ്കിലും, സാങ്കേതികവിദ്യ പൂർണ്ണമായി തടയുന്നത് വിദ്യാർത്ഥികളെ പ്രതിസന്ധിയിലാക്കുമെന്ന് ജസ്റ്റിസ് സൂര്യകാന്ത് ഓർമ്മിപ്പിച്ചു.
​കരാർ നിർമ്മാണം, നിയമ ഗവേഷണം, തെളിവുകളുടെ മാനേജ്മെന്റ്, തർക്ക പരിഹാരം തുടങ്ങിയ മേഖലകളിൽ എഐ ഇതിനോടകം തന്നെ വലിയ മാറ്റങ്ങൾ ഉണ്ടാക്കിക്കൊണ്ടിരിക്കുന്നുണ്ട്.
​ സാങ്കേതികവിദ്യ നിയമപരമായ കാര്യങ്ങളിൽ സഹായിക്കണമെന്നും എന്നാൽ അത് ഒരിക്കലും മനുഷ്യന്റെ നിയമപരമായ ന്യായവിചാരത്തിന് പകരമാവരുതെന്നും അദ്ദേഹം ഊന്നിപ്പറഞ്ഞു. എഐ നൽകുന്ന വിവരങ്ങൾ കണ്ണടച്ച് വിശ്വസിക്കാതെ, അവയുടെ കൃത്യത പരിശോധിക്കാനുള്ള ശേഷി വിദ്യാർത്ഥികൾക്ക് ഉണ്ടാകണം.
​അൽഗോരിതം ഉത്തരവാദിത്തം, ഡാറ്റാ സംരക്ഷണം, ഡിജിറ്റൽ നീതിന്യായ വ്യവസ്ഥ തുടങ്ങിയ വിഷയങ്ങളിൽ ഗവേഷണ കേന്ദ്രങ്ങളായി മാറാൻ നാഷണൽ ലോ യൂണിവേഴ്സിറ്റികൾ മുന്നോട്ടുവരണമെന്നും അദ്ദേഹം ആഹ്വാനം ചെയ്തു.