ദോഹ: മധ്യതിരുവിതാംകൂറിൽ നിന്നുള്ള പ്രവാസി മലയാളി സമൂഹത്തിൽ ബിസിനസ് രംഗത്ത് ശ്രദ്ധേയമായ നേട്ടങ്ങൾ കൈവരിച്ച പ്രമുഖ വ്യവസായി ശ്രീ. കുര്യൻ സി. ഐപ്പിന് (തമ്പു) ഫ്രണ്ട്സ് ഓഫ് തിരുവല്ലായുടെ (ഫോട്ടാ) ഖത്തർ ചാപ്റ്റർ ഏർപ്പെടുത്തിയ പ്രഥമ ബിസിനസ് ശ്രേഷ്ഠത പുരസ്കാരം സമ്മാനിക്കും.
എയ്റോഫ്രൈറ്റ് കമ്പനിയുടെ മാനേജിംഗ് ഡയറക്ടറായ ശ്രീ. കുര്യൻ സി. ഐപ്പിന് ഈ പുരസ്കാരം സെപ്റ്റംബർ 4-ന് നടക്കുന്ന ഫോട്ടാ ഓണാഘോഷ പരിപാടിയിൽ വെച്ച് തിരുവല്ല എം.എൽ.എ. അഡ്വ. വർഗീസ് മാമ്മൻ സമ്മാനിക്കും.
വളരെ ചെറിയ രീതിയിൽ തന്റെ ബിസിനസ് പ്രവർത്തനങ്ങൾ ആരംഭിച്ച ശ്രീ. കുര്യൻ സി. ഐപ്പ് ഇന്ന് തന്റെ ബിസിനസ് സംരംഭങ്ങളെ മിഡിൽ ഈസ്റ്റിലേക്കും മറ്റ് രാജ്യങ്ങളിലേക്കും വ്യാപിപ്പിച്ചിരിക്കുന്നു. ബിസിനസ് രംഗത്ത് അദ്ദേഹം കൈവരിച്ച ശ്രദ്ധേയമായ വിജയങ്ങൾ പ്രവാസി മലയാളി സമൂഹത്തിന് വലിയ അഭിമാനമാണ്.
അദ്ദേഹത്തിന്റെ നേട്ടങ്ങളും ദീർഘവീക്ഷണവും ബിസിനസ് രംഗത്തെ സമീപനവും പുതിയ തലമുറയിലെ മലയാളി യുവാക്കൾക്ക് പ്രചോദനവും വഴികാട്ടിയുമാണ്. കഠിനാധ്വാനത്തിലൂടെയും ആത്മവിശ്വാസത്തിലൂടെയും ദീർഘദർശനത്തിലൂടെയും ഉയരങ്ങൾ കീഴടക്കാമെന്ന സന്ദേശമാണ് അദ്ദേഹത്തിന്റെ ജീവിതയാത്ര നൽകുന്നത്.
23 വർഷമായി ഖത്തറിലെ തിരുവല്ലക്കാരുടെ കൂട്ടായ്മ
ഖത്തറിൽ കഴിഞ്ഞ 23 വർഷമായി പ്രവർത്തിച്ചുവരുന്ന ഫ്രണ്ട്സ് ഓഫ് തിരുവല്ലാ (ഫോട്ടാ), ഖത്തറിലെ തിരുവല്ലക്കാരുടെയും സമീപ പ്രദേശങ്ങളിൽ നിന്നുള്ള മലയാളികളുടെയും കൂട്ടായ്മയാണ്. ഖത്തറിലെ പ്രവാസി സമൂഹത്തിനിടയിലും തിരുവല്ലയിലെയും സ്വദേശപ്രദേശങ്ങളിലെയും ജനങ്ങൾക്കിടയിലും വിവിധ സാമൂഹ്യ, സാംസ്കാരിക, ജീവകാരുണ്യ പ്രവർത്തനങ്ങൾ നടത്തി ഫോട്ടാ ശ്രദ്ധേയമായ സേവന പ്രവർത്തനങ്ങൾ തുടരുന്നു.
പ്രവാസി സമൂഹത്തിലെ അംഗങ്ങൾക്കിടയിൽ സൗഹൃദവും ഐക്യവും വളർത്തുന്നതിനൊപ്പം, നാട്ടിലെ സാമൂഹ്യ-സാംസ്കാരിക പ്രവർത്തനങ്ങൾക്കും ജീവകാരുണ്യ സംരംഭങ്ങൾക്കും പിന്തുണ നൽകുന്നതിലും ഫോട്ടാ സജീവ പങ്കാളിത്തം വഹിച്ചുവരുന്നു.
ശ്രീ. കുര്യൻ സി. ഐപ്പിന് പ്രഥമ ബിസിനസ് ശ്രേഷ്ഠത പുരസ്കാരം നൽകുന്നതിനുള്ള തീരുമാനം ഫോട്ടായുടെ മാനേജിംഗ് കമ്മിറ്റി യോഗത്തിലാണ് എടുത്തത്.
യോഗത്തിൽ പ്രസിഡന്റ് ശ്രീ. തോമസ് കുര്യൻ അധ്യക്ഷത വഹിച്ചു. രക്ഷാധികാരി ശ്രീ. ജോൺ സി. എബ്രഹാം, ജനറൽ സെക്രട്ടറി ശ്രീ. അനീഷ് ജോർജ് മാത്യു, ഓണാഘോഷ കമ്മിറ്റി കൺവീനർ ശ്രീ. ജിജി ജോൺ, ശ്രീ. റോബിൻ എബ്രഹാം കോശി, ശ്രീ. നിതിൻ മാത്യു, ശ്രീ. അനു എബ്രഹാം, ബ്ലൂമി വർഗീസ് , എബിൻ പയ്യനാട്ട് എന്നിവർ പ്രസംഗിച്ചു.
