ദോഹ: ഖത്തറിൽ വാർഷിക നെയ്മീൻ (Kingfish) വേട്ടയ്ക്കുള്ള നിരോധനം ഓഗസ്റ്റ് 15 മുതൽ പ്രാബല്യത്തിൽ വരുമെന്ന് നഗരസഭ മന്ത്രാലയത്തിലെ ഫിഷറീസ് വകുപ്പ് അറിയിച്ചു. ഒക്ടോബർ 31 വരെയാണ് നിരോധന സമയം. മത്സ്യസമ്പത്ത് സംരക്ഷിക്കുന്നതിനും കടൽ വിഭവങ്ങളുടെ സുസ്ഥിരത ഉറപ്പാക്കുന്നതിനുമാണ് ഈ നടപടി.
നിരോധന കാലയളവിൽ ഗിൽ നെറ്റുകൾ (Gill nets) ഉപയോഗിച്ചുള്ള നെയ്മീൻ പിടുത്തത്തിന് പൂർണ്ണ നിരോധനമുണ്ടാകും. കൂടാതെ, സീസണിലുടനീളം ഇത്തരം വലകൾ കൊണ്ടുപോകുന്നതും വിപണനം നടത്തുന്നതും നിരോധിച്ചിട്ടുണ്ട്. എന്നാൽ, ചരട്/ചൂണ്ട (Hand lines) മാത്രം ഉപയോഗിച്ച് മീൻ പിടിക്കാൻ നിബന്ധനകൾക്ക് വിധേയമായി അനുമതിയുണ്ടായിരിക്കും.
രാജ്യത്തെ മത്സ്യസമ്പത്തും സമുദ്ര പരിസ്ഥിതിയും വരുംതലമുറയ്ക്കായി സംരക്ഷിക്കുന്നതിന് എല്ലാ മത്സ്യബന്ധന തൊഴിലാളികളും കച്ചവടക്കാരും പൊതുജനങ്ങളും നിയമങ്ങൾ കർശനമായി പാലിക്കണമെന്ന് മന്ത്രാലയം അഭ്യർത്ഥിച്ചു.
