തിരുവനന്തപുരം: വൈദ്യുതി പ്രതിസന്ധിയിൽ കേരളത്തിന് തൽക്കാലം ആശ്വാസമില്ല. അധിക വൈദ്യുതി ലഭ്യമാക്കാൻ കെ.എസ്.ഇ.ബി നടത്തിയ നീക്കങ്ങൾ കാര്യമായ ഫലം കാണാത്തതോടെ സംസ്ഥാനത്ത് വൈദ്യുതി നിയന്ത്രണത്തിനുള്ള സാധ്യത തുടരുകയാണ്. ഡൽഹി, ഉത്തർപ്രദേശ്, ഒഡിഷ, ഹിമാചൽപ്രദേശ് എന്നിവിടങ്ങളിൽനിന്ന് വൈദ്യുതി ലഭ്യമാക്കാനുള്ള ചർച്ചകൾക്ക് പ്രതീക്ഷിച്ച ഫലം ലഭിച്ചില്ല.

ഹിമാചൽപ്രദേശിൽനിന്ന് വൈദ്യുതി എത്തിക്കാനുള്ള സാധ്യത നേരത്തെ ഉയർന്നിരുന്നെങ്കിലും നിലവിൽ അവിടെനിന്നുള്ള വൈദ്യുതി പഞ്ചാബിന് നൽകുന്നതിനുള്ള കരാറാണ് നിലനിൽക്കുന്നത്. ഒക്ടോബർ വരെ ഈ കരാർ തുടരും. അതിനുശേഷം കേരളത്തിന് വൈദ്യുതി നൽകുന്നത് പരിഗണിക്കാമെന്നാണ് ഹിമാചൽ അധികൃതർ അറിയിച്ചിരിക്കുന്നത്. കോൺഗ്രസ് നേതാവ് കെ.സി. വേണുഗോപാലിന്റെ ഇടപെടലും ഇതുമായി ബന്ധപ്പെട്ട് ഉണ്ടായിരുന്നുവെന്നാണ് വിവരം.

അതേസമയം, സംസ്ഥാനത്തെ വൈദ്യുതി ആവശ്യകതയിൽ കാര്യമായ കുറവുണ്ടാകാത്തതാണ് കെ.എസ്.ഇ.ബിക്ക് മുന്നിലുള്ള പ്രധാന വെല്ലുവിളി. ശരാശരി ഒൻപത് കോടി യൂണിറ്റിനടുത്താണ് ഇപ്പോഴും പ്രതിദിന ഉപഭോഗം. തത്സമയ വൈദ്യുതി വിപണിയിൽ ആവശ്യത്തിന് വൈദ്യുതി ലഭിക്കാത്ത ദിവസങ്ങളിലും ഉപഭോഗം ഉയർന്നുനിൽക്കുന്ന സാഹചര്യത്തിലും നിയന്ത്രണം ഏർപ്പെടുത്തേണ്ടിവരാം.

നിലയങ്ങളിലെ തകരാറുകളും വൈദ്യുതി ലഭ്യതയെ ബാധിക്കുന്നുണ്ട്. ദീർഘകാല കരാറുകളിലൂടെ ലഭിക്കേണ്ട 270 മെഗാവാട്ട് വൈദ്യുതി നിലവിൽ മുടങ്ങിയിരിക്കുകയാണ്. തകരാർ ബുധനാഴ്ചയോടെ പരിഹരിക്കാനാകുമെന്നാണ് പ്രതീക്ഷ. ചൊവ്വാഴ്ച മാത്രം ഏകദേശം 600 മെഗാവാട്ടിന്റെ കുറവാണ് സംസ്ഥാനത്ത് നേരിട്ടത്.

മഴയാണ് നിലവിൽ കേരളത്തിന്റെ പ്രതീക്ഷ. അടുത്ത മൂന്ന് ദിവസങ്ങളിൽ സംസ്ഥാനത്ത് വ്യാപക മഴയ്ക്ക് സാധ്യതയുണ്ടെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. മഴ ശക്തമാകുന്നതോടെ വൈദ്യുതി ഉപഭോഗം കുറയുകയാണെങ്കിൽ നിയന്ത്രണം ഒഴിവാക്കാനാകുമെന്നാണ് കെ.എസ്.ഇ.ബിയുടെ കണക്കുകൂട്ടൽ. എന്നാൽ മഴ ലഭിച്ചിട്ടും ചില പ്രദേശങ്ങളിൽ തിങ്കളാഴ്ച വൈദ്യുതി മുടങ്ങിയത് പ്രതിസന്ധിയുടെ തീവ്രത വ്യക്തമാക്കുന്നതാണ്.

അധിക വൈദ്യുതി കണ്ടെത്താനുള്ള ശ്രമങ്ങളുടെ ഭാഗമായി ഉത്തരേന്ത്യൻ സംസ്ഥാനങ്ങളിൽ സന്ദർശനം നടത്തുന്ന കെ.എസ്.ഇ.ബി ഡയറക്ടർമാർ സെപ്റ്റംബർ 25-ന് കേരളത്തിൽ തിരിച്ചെത്തും. സെപ്റ്റംബർ 26-ന് കേന്ദ്ര ഊർജ സെക്രട്ടറിയുടെ സാന്നിധ്യത്തിൽ അവലോകനയോഗവും നടക്കും. സംസ്ഥാനത്തെ വൈദ്യുതി ലഭ്യതയും നിയന്ത്രണം ഒഴിവാക്കാനുള്ള തുടർനടപടികളും യോഗത്തിൽ ചർച്ചയായേക്കും.