തിരുവനന്തപുരം: വരാനിരിക്കുന്ന തദ്ദേശ, നിയമസഭാ തിരഞ്ഞെടുപ്പുകളെപ്പറ്റി എൽ.ഡി.എഫിനോ സി.പി.എമ്മിനോ യാതൊരു ഭയവുമില്ലെന്നും കേരളം ഇനി എന്നും ഇടതുപക്ഷത്തിനൊപ്പമായിരിക്കുമെന്നും സി.പി.എം. ജനറൽ സെക്രട്ടറി എം.എ. ബേബി. കഴിഞ്ഞ പത്തുവർഷത്തെ ഇടതു ഭരണത്തിൽ ജനങ്ങൾ സംതൃപ്തരാണെന്നും വികസന, ക്ഷേമ പ്രവർത്തനങ്ങൾ ജനങ്ങൾ തിരിച്ചറിയുമെന്നും അദ്ദേഹം വ്യക്തമാക്കി.
​പ്രധാന വിഷയങ്ങളിലെ എം.എ. ബേബിയുടെ പ്രതികരണങ്ങൾ:
​തദ്ദേശ തിരഞ്ഞെടുപ്പ്: കഴിഞ്ഞ തവണ നേടിയതിനേക്കാൾ കൂടുതൽ സീറ്റുകൾ എൽ.ഡി.എഫ് നേടും. കാശുകൊടുത്ത് വോട്ട് വാങ്ങുന്നതല്ല, ജനം ഹൃദയത്തിൽ നിന്ന് നൽകുന്നതാണ്.
​സർക്കാർ വിലയിരുത്തൽ: കേരളം തുടർച്ചയായി പത്തുവർഷം ഇടതുപക്ഷം ഭരിക്കുന്നത് ചരിത്രമാണ്. വികസന പ്രവർത്തനങ്ങളും സാധാരണക്കാരുടെ പ്രശ്‌നങ്ങളിലുള്ള ഇടപെടലുമാണ് ഇതിന് കാരണം. 'പവർ കട്ട്' ഇല്ലാത്ത ഏക സംസ്ഥാനം കേരളമാണ്.
​ക്ഷേമ പ്രവർത്തനങ്ങൾ: പെൻഷൻ വർധനവും ആനുകൂല്യങ്ങളും കൈക്കൂലിയല്ല; സാധാരണക്കാർക്ക് അർഹതപ്പെട്ടതാണ്. തീവ്ര ദാരിദ്ര്യ നിർമാർജനമാണ് കേരളത്തിൽ നടന്നത്. നാലേമുക്കാൽ ലക്ഷം അടച്ചുറപ്പുള്ള വീടുകൾ നൽകി.
​വിവാദങ്ങൾ (ശബരിമല, പി.എം.ശ്രീ):
​ശബരിമല: കേസ് അന്വേഷിക്കുന്നത് പക്ഷപാതരഹിതമായാണ്. സി.പി.എം. ബന്ധമുള്ളവർ അറസ്റ്റിലായിട്ടും പാർട്ടി സംരക്ഷണം നൽകിയില്ല. കുറ്റപത്രം സമർപ്പിക്കപ്പെട്ടാൽ അതിന്റെ ഗൗരവം അനുസരിച്ച് നേതാക്കൾക്കെതിരെ പാർട്ടി നടപടി പരിശോധിക്കും.
​പി.എം.ശ്രീ: അർഹിക്കുന്ന സാമ്പത്തിക സഹായം നൽകാതെ കേന്ദ്രം കേരളത്തെ വീർപ്പുമുട്ടിക്കുമ്പോൾ യു.ഡി.എഫ്. എം.പിമാർ മൗനം പാലിച്ചു. ബി.ജെ.പിയുടെ വർഗീയ അജണ്ട പാഠ്യപദ്ധതിയിലൂടെ നടപ്പാക്കാൻ കേരളം അനുവദിക്കില്ല.
​രാഹുൽ മാങ്കൂട്ടത്തിൽ നടപടി: പ്രതിപക്ഷ നേതാവിന് പരാതികൾ കിട്ടിയിട്ടും ഇത്രയും കാലം പൂഴ്ത്തിവച്ചത് എന്തുകൊണ്ട്? നിൽക്കക്കള്ളിയില്ലെന്ന് വന്നപ്പോഴാണ് തിരഞ്ഞെടുപ്പിനെ പേടിച്ച് ഇപ്പോൾ പുറത്താക്കിയത്.
​വക്താവ്: സി.പി.എമ്മിന് അഭിപ്രായം പറയാൻ ഔദ്യോഗിക വക്താക്കളില്ല. പാർട്ടി നിർദേശിച്ച ചട്ടക്കൂടിൽ നിന്നുകൊണ്ട് നേതാക്കൾക്ക് മറുപടി പറയാം.