കൊച്ചി: ഭാഷകളുടെ പേരിൽ വലുപ്പ ചെറുപ്പ വിവേചനം ഇല്ലാത്തതാണ് സമൂഹനന്മയ്ക്ക് അഭികാമ്യം എന്ന് ജസ്റ്റിസ് ദേവൻ രാമേന്ദ്രൻ അഭിപ്രായപ്പെട്ടു.കേന്ദ്ര വിദ്യാഭ്യാസ വകുപ്പിന്റെ കീഴിൽ പ്രവർത്തിക്കുന്ന കേരള ഹിന്ദി പ്രചാര സഭ സംസ്ഥാനത്ത് സിബിഎസ്ഇ ഐ സി എസ് സി സ്കൂളുകളിൽ നടത്തിയ   സുഗമ ഹിന്ദി പരീക്ഷകളിലെ റാങ്ക് ജേതാക്കൾക്കും സ്കൂളുകൾക്കും ഏർപ്പെടുത്തിയ  പുരസ്കാര വിതരണം സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.എല്ലാ ഭാഷകൾക്കും തുല്യപ്രാധാന്യമുണ്ടെങ്കിലും മാതൃഭാഷക്കും രാജ്യത്ത് കൂടുതൽ പേർ ഉപയോഗിക്കുന്ന ഭാഷക്കും പ്രാധാന്യമുണ്ടെന്ന് അദ്ദേഹം പറഞ്ഞു.ഭാഷാ പഠനത്തിലൂടെ വിദ്യാഭ്യാസ രംഗത്ത് വിപ്ലവകരമായ മാറ്റങ്ങളും മുന്നേറ്റങ്ങളും ഉണ്ടാക്കാൻ സാധിക്കുമെന്നും ജസ്റ്റിസ് ദേവൻ രാമചന്ദ്രൻ ചൂണ്ടിക്കാട്ടി.മാതൃഭാഷയിലൂടെ മാനവിക ആശയങ്ങൾ ഹൃദ്യമായി പ്രകടിപ്പിക്കുവാൻ സാധിക്കുന്നത് നല്ല ചിന്ത ബുദ്ധി മാനവികത എന്നീ ഗുണങ്ങൾ ഉൾച്ചേരുന്നതു കൊണ്ടാണെന്ന് അദ്ദേഹം പറഞ്ഞു.വിദ്യാഭ്യാസം കേവലം ചിന്തിക്കാൻ വേണ്ടി മാത്രമല്ല സത്യസന്ധമായും നീതിയുക്തമായും  ചിന്തിക്കുന്നതിനും പ്രവർത്തിക്കാനുമുള്ള മഹത്തരമായ ഉപാധിയാണ്.
അതുകൊണ്ട് വിവിധങ്ങളായ ഭാഷാ പഠനം കാലഘട്ടത്തിൻറെ ആവശ്യമാണെന്നും സുഗമ ഹിന്ദി പരീക്ഷയിലൂടെ പുതിയ തലമുറയെ  നന്മയുടെ ഭാഷയിലൂടെ വളർത്തിയെടുക്കാൻ കേരള ഹിന്ദി പ്രചാരസഭയ്ക്ക് കഴിയട്ടെ എന്നും ദേവൻ രാമേന്ദ്രൻ പറഞ്ഞു. കേരള ഹിന്ദി പ്രചാര സഭ സെക്രട്ടറിയും കേന്ദ്ര ആരോഗ്യ കുടുംബ ക്ഷേമ മന്ത്രാലയ ഉപദേശക സമിതി അംഗവുമായ അഡ്വക്കേറ്റ് ബി മധു അധ്യക്ഷത വഹിച്ചു. പ്രമുഖ നടിയും നർത്തകയുമായ ഊർമ്മിള ഉണ്ണി സുഖമാ ഹിന്ദി പരീക്ഷയിൽ ഉന്നത വിജയം നേടിയ കുട്ടികൾക്കും സ്കൂളുകൾക്കും അധ്യാപകർക്കും ഉള്ള പുരസ്കാരങ്ങൾ വിതരണം ചെയ്തു.. എറണാകുളത്ത് ഭവൻസ് വിദ്യാമന്ദിർ ഓഡിറ്റോറിയത്തിൽ നടന്ന പ്രൗഢ ചടങ്ങിൽ ഡയറക്ടർ ഇ .രാമൻകുട്ടി,പ്രിൻസിപ്പാൾ കെ.മിനി, എറണാകുളം പ്രസ് ക്ലബ് സെക്രട്ടറി എം ഷജിൽ കുമാർ, ജസ്റ്റിസ് വി ആർ കൃഷ്ണയ്യർ ഫൗണ്ടേഷൻ- തണൽപരിവാർ കേന്ദ്രീയ ഹിന്ദി മഹാവിദ്യാലയം സെക്രട്ടറി കെ എം നാസർ, കേരള ഹിന്ദി പ്രചാര സഭ അംഗങ്ങളായ ടി യു ഗോപകുമാർ ,ആർ അനിൽകുമാർ പ്രസംഗിച്ചു.

Photo Courtesy - Google