ദോഹ: വടക്കുപടിഞ്ഞാറൻ സിറിയയിലെ അബു അൽ ദുഹൂർ സൈനിക വിമാനത്താവളത്തിന് നേരെ ഇസ്രായേൽ നടത്തിയ വ്യോമാക്രമണത്തെ കടുത്ത ഭാഷയിൽ അപലപിച്ച് ഖത്തർ ഉൾപ്പെടെയുള്ള 12 രാജ്യങ്ങളുടെ വിദേശകാര്യ മന്ത്രിമാർ. സിറിയയുടെ सार्वഭൗമത്വത്തിനും സുരക്ഷയ്ക്കും അഖണ്ഡതയ്ക്കും നേരെയുള്ള നഗ്നമായ ലംഘനവും മേഖലയിൽ വലിയ സംഘർഷങ്ങൾക്ക് വഴിവെക്കുന്ന നടപടിയുമാണിതെന്ന് മന്ത്രിമാർ കൂട്ടായ പ്രസ്താവനയിലൂടെ വ്യക്തമാക്കി.
ഖത്തർ, ജോർദാൻ, അൽജീരിയ, ഇന്തോനേഷ്യ, ലെബനൻ, മലേഷ്യ, മൗറിറ്റാനിയ, പാകിസ്താൻ, ഫലസ്തീൻ, സൗദി അറേബ്യ, സൊമാലിയ, തുർക്കി എന്നീ രാജ്യങ്ങളിലെ വിദേശകാര്യ മന്ത്രിമാരാണ് ഇസ്രായേൽ ആക്രമണത്തിനെതിരെ സംയുക്തമായി രംഗത്തെത്തിയത്.സിറിയയ്‌ക്കെതിരെ തുടർച്ചയായി ഉണ്ടാകുന്ന അധിനിവേശങ്ങൾക്കെതിരെ അന്താരാഷ്ട്ര സമൂഹം ശക്തവും വ്യക്തവുമായ നിലപാട് സ്വീകരിക്കണമെന്നും സംയുക്ത പ്രസ്താവനയിലൂടെ വിദേശകാര്യ മന്ത്രിമാർ ആവശ്യപ്പെട്ടു.
