ടെഹ്റാൻ: അമേരിക്ക–ഇറാൻ സംഘർഷം വീണ്ടും രൂക്ഷമാകുന്നു. അമേരിക്ക കരയുദ്ധത്തിന് തയ്യാറെടുക്കുന്നു എന്ന വാർത്തകൾക്ക് പിന്നാലെ കടുത്ത മുന്നറിയിപ്പുകളുമായി ഇറാൻ സൈന്യം രംഗത്തെത്തി. ഇറാനെതിരെ കരയുദ്ധത്തിന് അമേരിക്ക ശ്രമിച്ചാൽ അതിന്റെ പ്രത്യാഘാതം “ഭീകരമായിരിക്കും” എന്നായിരുന്നു ഇറാൻ സൈന്യം പ്രതികരിച്ചത്.
കരയുദ്ധത്തിനെത്തുന്ന അമേരിക്കൻ സൈനികർ പേർഷ്യൻ ഉൾക്കടലിലെ സ്രാവുകൾക്ക് ഭക്ഷണമാകും എന്നായിരുന്നു ഇറാൻ സൈനിക വക്താവ് ഇബ്രാഹിം സോൽഫഘാരി പ്രതികരിച്ചത്. യുഎസിന്റെ യുദ്ധക്കപ്പൽ യുഎസ്എസ് ട്രിപ്പോളി 3500 സൈനികരുമായി മധ്യപൂർവദേശത്ത് എത്തിയെന്ന റിപ്പോർട്ടുകൾക്ക് പിന്നാലെയാണ് ഈ പ്രതികരണം. കൂടാതെ, കൂടുതൽ സൈനികരെ വിന്യസിക്കാനുള്ള നീക്കവും നടക്കുന്നുവെന്നാണ് സൂചന.
രാഷ്ട്രീയ തലത്തിലും ആരോപണങ്ങൾ ശക്തമാണ്. യുഎസ് പരസ്യമായി നയതന്ത്രം സംസാരിക്കുമ്പോഴും രഹസ്യമായി സൈനിക നീക്കങ്ങൾ ആസൂത്രണം ചെയ്യുകയാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഘർ ഖലിബാഫ് ആരോപിച്ചു. ഇറാന്റെ കീഴടങ്ങൽ ആവശ്യപ്പെടുന്ന സമീപനം അംഗീകരിക്കില്ലെന്നും അദ്ദേഹം വ്യക്തമാക്കി.
അതേസമയം, നയതന്ത്ര ശ്രമങ്ങൾ തുടരുന്നുവെന്ന നിലപാട് ആവർത്തിച്ച് യുഎസ് പ്രസിഡന്റ് ഡോണൾഡ് ട്രംപ് രംഗത്തെത്തി. പാക്കിസ്ഥാൻ മധ്യസ്ഥതയിൽ ചർച്ചകൾ പുരോഗമിക്കുന്നുവെന്ന് അവരുടേതായ വിദേശകാര്യ മന്ത്രാലയം അറിയിച്ചു. ഇതിനിടെ, തുർക്കി, സൗദി അറേബ്യ, ഈജിപ്ത് എന്നീ രാജ്യങ്ങളും സമാധാന ശ്രമങ്ങൾക്ക് നീക്കമെടുക്കുന്നതിനാൽ, സംഘർഷത്തിനിടയിലും നയതന്ത്ര സാധ്യതകൾ സജീവമാണ്.
