ഇന്ത്യൻ മഹാസമുദ്രത്തിലെ നിർണായക സൈനിക കേന്ദ്രമായ ഡീഗോ ഗാർഷ്യ ലക്ഷ്യമിട്ട് ഇറാൻ ബാലിസ്റ്റിക് മിസൈൽ ആക്രമണം നടത്തിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. അമേരിക്കയും ബ്രിട്ടനും ചേർന്ന് നിയന്ത്രിക്കുന്ന സൈനിക താവളത്തിന് നേരെയായിരുന്നു ആക്രമണമെന്നാണ് റിപ്പോർട്ട്. ഇറാൻ വിക്ഷേപിച്ച മിസൈലുകളിൽ ഒന്ന് യാത്രാമധ്യേ പരാജയപ്പെട്ടതായും രണ്ടാമത്തേത് ഒരു യുഎസ് യുദ്ധക്കപ്പലിൽ നിന്ന് തൊടുത്തുവിട്ട മിസൈൽ ഉപയോഗിച്ച് തകർത്തതായും 'ദി വാൾ സ്ട്രീറ്റ് ജേണൽ' റിപ്പോർട്ട് ചെയ്യുന്നു.
ഇതിനിടെ, പശ്ചിമേഷ്യയിലെ സൈനിക നടപടികൾ അവസാനിപ്പിക്കുന്നതിനെക്കുറിച്ച് ആലോചിക്കുന്നതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. ഇറാന്റെ മിസൈൽ ശേഷി തകർക്കുക, പ്രതിരോധ വ്യവസായ അടിസ്ഥാനങ്ങളെ നശിപ്പിക്കുക, നാവിക-വ്യോമ സേനകളെ ദുർബലപ്പെടുത്തുക തുടങ്ങിയ പ്രധാന ലക്ഷ്യങ്ങൾ കൈവരിക്കുന്നതിലേക്ക് നീങ്ങുകയാണെന്ന് അദ്ദേഹം സോഷ്യൽ മീഡിയയിൽ കുറിച്ചു.
കൂടാതെ, ഹോർമുസ് കടലിടുക്കിന്റെ സുരക്ഷ ഉറപ്പാക്കേണ്ടത് അതുപയോഗിക്കുന്ന രാജ്യങ്ങളുടെ ഉത്തരവാദിത്വമാണെന്നും, അമേരിക്ക അതിൽ നേരിട്ട് ഇടപെടില്ലെന്നും ട്രംപ് വ്യക്തമാക്കി. ആവശ്യമുള്ളപ്പോൾ സഹായം നൽകാമെങ്കിലും, ഇറാന്റെ ഭീഷണി അവസാനിച്ചാൽ അത്തരമൊരു ഇടപെടലിന്റെ ആവശ്യം ഇല്ലാതാകുമെന്നും അദ്ദേഹം കൂട്ടിച്ചേർത്തു.
