ദോഹ: 2025-ലെ ദേശീയ സൈബർ ഡ്രില്ലിൽ മികച്ച പ്രകടനം കാഴ്ചവെച്ച വിവിധ സർക്കാർ, സ്വകാര്യ സ്ഥാപനങ്ങളെ ദേശീയ സൈബർ സുരക്ഷാ ഏജൻസി (NCSA) ആദരിച്ചു. ദോഹയിൽ നടന്ന പ്രൗഢഗംഭീരമായ ചടങ്ങിലായിരുന്നു പുരസ്കാരങ്ങൾ വിതരണം ചെയ്തത്.
സൈബർ ആക്രമണങ്ങളെ പ്രതിരോധിക്കുന്നതിനും രാജ്യത്തിന്റെ ഡിജിറ്റൽ സുരക്ഷ ശക്തമാക്കുന്നതിനുമായി സംഘടിപ്പിച്ച ഡ്രില്ലിന്റെ ലക്ഷ്യങ്ങൾ പൂർണ്ണമായും കൈവരിക്കാൻ സാധിച്ചതായി സൈബർ ഡ്രിൽ കമ്മിറ്റി കമാൻഡർ മുഹമ്മദ് അൽ മന്നായി അറിയിച്ചു.രാജ്യത്തെ 13 സുപ്രധാന മേഖലകളിൽ നിന്നായി 95 സർക്കാർ, സ്വകാര്യ സ്ഥാപനങ്ങൾ സൈബർ ഡ്രില്ലിന്റെ ഭാഗമായി.ആധുനിക സൈബർ വെല്ലുവിളികളെ നേരിടുന്നതിൽ വിവിധ സ്ഥാപനങ്ങളുടെ തയ്യാറെടുപ്പും കാര്യക്ഷമതയും വർധിപ്പിക്കാൻ ഈ പരിശീലനത്തിലൂടെ സാധിച്ചു.സൈബർ ഡ്രിൽ 2025-ന്റെ പ്രധാന കണ്ടെത്തലുകളും ഫലങ്ങളും ചടങ്ങിൽ ഹമദ് അൽ ഖാതർ അവതരിപ്പിച്ചു.
രാജ്യത്തിന്റെ സുപ്രധാന അടിസ്ഥാന സൗകര്യങ്ങൾക്കും സേവനങ്ങൾക്കും നേരെ ഉണ്ടാകാനിടയുള്ള സൈബർ ഭീഷണികളെ നേരിടാൻ ഖത്തർ എത്രത്തോളം സജ്ജമാണെന്ന് വിലയിരുത്താനാണ് ഈ പരിശീലനം ലക്ഷ്യമിടുന്നത്. പങ്കെടുത്ത എല്ലാ സ്ഥാപനങ്ങളും മികച്ച സഹകരണമാണ് നൽകിയതെന്നും സൈബർ സുരക്ഷാ രംഗത്ത് രാജ്യം കൈവരിച്ച വലിയ മുന്നേറ്റമാണിതെന്നും അധികൃതർ വ്യക്തമാക്കി.
