​ദോഹ:ആഗോളതലത്തിൽ വർദ്ധിച്ചുവരുന്ന അസ്ഥിരതകളെയും വെല്ലുവിളികളെയും നേരിടാൻ 'ഗവേഷണം, വികസനം, നവീകരണം' (RDI) എന്നീ മേഖലകളെ രാജ്യത്തിന്റെ കരുത്തുറ്റ തൂണുകളായി മാറ്റണമെന്ന് ഖത്തർ റിസർച്ച് ഡെവലപ്‌മെന്റ് ആൻഡ് ഇന്നൊവേഷൻ (QRDI) കൗൺസിലിലെ ഗവേഷകർ. പ്രതിസന്ധികളുണ്ടാകുമ്പോൾ ഗവേഷണ മേഖലയിൽ നിന്ന് പിന്നോട്ട് പോകുന്നതിന് പകരം, കൂടുതൽ നിക്ഷേപവും ശ്രദ്ധയും ഈ രംഗത്ത് നൽകുകയാണ് വേണ്ടതെന്ന് ഡോ. മുഹമ്മദ് അൽ ഹൊസാനിയും ഡോ. അബ്ദല്ലാഹി ഹുസൈനും ചൂണ്ടിക്കാട്ടി.
​ക്യു.ആർ.ഡി.ഐ വെബ്‌സൈറ്റിൽ പ്രസിദ്ധീകരിച്ച ലേഖനത്തിലാണ് ശാസ്ത്രലോകത്തെ ഈ പുത്തൻ കാഴ്ചപ്പാടുകൾ ഇരുവരും പങ്കുവെച്ചത്.കഴിഞ്ഞ രണ്ട് പതിറ്റാണ്ടായി ഗവേഷണ മേഖലയിൽ ഖത്തർ നടത്തുന്ന നിക്ഷേപങ്ങൾ രാജ്യത്തെ സുരക്ഷിതമായ നിലയിൽ എത്തിച്ചിട്ടുണ്ട്. ക്യു.ആർ.ഡി.ഐ 2030 തന്ത്രം, മികച്ച അക്കാദമിക് സൗകര്യങ്ങൾ, ആഗോള പ്രതിഭകളെ ആകർഷിക്കാനുള്ള കഴിവ് എന്നിവ ഖത്തറിന് മുതൽക്കൂട്ടാണ്.മഹാമാരികൾ, യുദ്ധങ്ങൾ, വിതരണ ശൃംഖലയിലെ തടസ്സങ്ങൾ എന്നിവയുണ്ടാകുമ്പോൾ വേഗത്തിൽ പൊരുത്തപ്പെടാൻ ശക്തമായ ആർ.ഡി.ഐ (RDI) സംവിധാനമുള്ള രാജ്യങ്ങൾക്കേ സാധിക്കൂ. സാങ്കേതിക ശേഷിയും വൈദഗ്ധ്യമുള്ള മനുഷ്യവിഭവവും ഇത്തരം സാഹചര്യങ്ങളിൽ തുണയാകും.കമ്പ്യൂട്ടിംഗ്, ഇന്റർനെറ്റ്, ജി.പി.എസ്, കോവിഡ് കാലത്തെ വാക്സിനുകൾ എന്നിവയെല്ലാം പ്രതിസന്ധി ഘട്ടങ്ങളിലാണ് വേഗത്തിൽ വികസിപ്പിക്കപ്പെട്ടത്. എന്നാൽ ഇവയുടെ അടിസ്ഥാനം വർഷങ്ങളായി നടന്നുവന്ന ഗവേഷണങ്ങളായിരുന്നു. ഇന്നത്തെ കാലത്ത് കൃത്രിമബുദ്ധി (AI), സൈബർ സുരക്ഷ എന്നിവയിലുണ്ടാകുന്ന മുന്നേറ്റങ്ങളും ഇത്തരത്തിൽ മുൻകൂട്ടിയുള്ള നിക്ഷേപങ്ങളുടെ ഫലമാണ്.സിംഗപ്പൂർ, ദക്ഷിണ കൊറിയ, ജപ്പാൻ തുടങ്ങിയ രാജ്യങ്ങൾ പ്രതിസന്ധി ഘട്ടങ്ങളിൽ എങ്ങനെയാണ് ഗവേഷണത്തെ ദേശീയ നയത്തിന്റെ കേന്ദ്രബിന്ദുവാക്കിയതെന്ന് ലേഖനം ഉദാഹരിക്കുന്നു.
​സമാധാനകാലത്ത് ഗവേഷണത്തിൽ നിക്ഷേപം നടത്താത്തവർ പ്രതിസന്ധിയിൽ പതറുമെന്നും, എന്നാൽ ഇത്തരം ഘട്ടങ്ങളിൽ ഗവേഷണത്തിന് മുൻഗണന നൽകുന്നവർ കൂടുതൽ കരുത്തോടെയും മത്സരക്ഷമതയോടെയും തിരിച്ചുവരുമെന്നും ഗവേഷകർ ഓർമ്മിപ്പിക്കുന്നു.