ദോഹ:പ്രവാസി മലയാളി ഉൾപ്പെടെയുള്ള ഇന്ത്യൻ സമൂഹത്തിന് അറിവിന്റെയും സാംസ്കാരിക കൈമാറ്റത്തിന്റെയും സുഗന്ധം പകരാൻ അത്യാധുനിക സൗകര്യങ്ങളോടെ ഒരുക്കിയ പുതിയ ഐ.സി.സി ലൈബ്രറിയുടെ ഔദ്യോഗിക ഉദ്ഘാടനം ഇന്ത്യൻ അംബാസഡർ വിപുൽ നിർവഹിച്ചു.
​ഖത്തർ നാഷണൽ ലൈബ്രറി എക്സിക്യൂട്ടീവ് ഡയറക്ടർ ടാൻ ഹുയിസം, ഇന്ത്യൻ എംബസി കൗൺസിലറും (ഹെഡ് ഓഫ് ചാൻസറി & കോൺസുലർ) ഐ.സി.സി കോർഡിനേറ്റിങ് ഓഫീസറുമായ ഡോ. വൈഭവ് എ. ടാണ്ടാലെ എന്നിവർ ചടങ്ങിൽ വിശിഷ്ടാതിഥികളായിരുന്നു.
​വിജ്ഞാനത്തിന്റെ ഈ പുത്തൻ ചുവടുവെപ്പിനെ ഇന്ത്യൻ അംബാസഡർ വിപുൽ ഹൃദയപൂർവ്വം പ്രശംസിച്ചു. ജീവിതകാലം മുഴുവൻ നീണ്ടുനിൽക്കുന്ന വായനയും നിരന്തരമായ പഠനവുമാണ് ഓരോ വ്യക്തിയുടെയും ആന്തരിക വളർച്ചയ്ക്ക് ആധാരമെന്ന് ഇന്ത്യൻ സ്ഥാനപതി ഓർമ്മിപ്പിച്ചു. മാനവികതയെ ഒന്നിപ്പിക്കുന്നതിലും വിജ്ഞാനത്തിന്റെ വെളിച്ചം തലമുറകളിലേക്ക് പകരുന്നതിലും ലൈബ്രറികൾ വഹിക്കുന്ന അതുല്യമായ പങ്കിനെക്കുറിച്ച് ഖത്തർ നാഷണൽ ലൈബ്രറി എക്സിക്യൂട്ടീവ് ഡയറക്ടർ ടാൻ ഹുയിസം ഹൃദ്യമായി സംസാരിച്ചു.
​വിവിധ ഇന്ത്യൻ ഭാഷകളിലായി ഏഴായിരത്തിലധികം പുസ്തകങ്ങളുടെ അമൂല്യ ശേഖരമാണ് ഈ അക്ഷരമുറ്റത്ത് സജ്ജീകരിച്ചിരിക്കുന്നത്. ഇതോടെ ഖത്തറിലെ ഏറ്റവും വലിയ കമ്മ്യൂണിറ്റി ഇന്ത്യൻ ഭാഷാ ലൈബ്രറികളിലൊന്നായി ഈ വിജ്ഞാനകേന്ദ്രം മാറി. മരുഭൂമിയിലെ അക്ഷരസ്നേഹികളായ വിവിധ ഇന്ത്യൻ പ്രവാസി സംഘടനകളും വ്യക്തികളും നെഞ്ചോടുചേർത്ത് സമ്മാനിച്ച പുസ്തകങ്ങളാണ് ഈ ലൈബ്രറിയുടെ ആത്മാവെന്നത് ഇതിന്റെ മാറ്റുകൂട്ടുന്നു.
​ഈ സ്വപ്നപദ്ധതി യാഥാർഥ്യമാക്കാൻ അകമഴിഞ്ഞ് സഹായിച്ച ഹോം ആർ അസ് (Home r Us), എയറോ ഗ്രൂപ്പ് ഓഫ് കമ്പനീസ് (Aero Group of Companies), അൽ ടെക് അലുമിനിയം & സ്റ്റീൽ (Al Tech Aluminium & Steel WLL) എന്നീ സ്ഥാപനങ്ങളെയും, അറിവിന്റെ വസന്തമൊരുക്കാൻ പുസ്തകങ്ങൾ സംഭാവന ചെയ്ത മഹാമനസ്കരായ വ്യക്തികളെയും സംഘടനകളെയും ചടങ്ങിൽ ആദരപൂർവ്വം ആദരിച്ചു.
​ഐ.സി.സി പ്രസിഡന്റ് എ.പി. മണികണ്ഠന്റെ അധ്യക്ഷതയിൽ ചേർന്ന പ്രൗഢഗംഭീരമായ ചടങ്ങിൽ ഐ.സി.സി ജനറൽ സെക്രട്ടറി അബ്രഹാം കെ. ജോസഫ് സ്വാഗതവും, വൈസ് പ്രസിഡന്റ് ശാന്തനു ദേശ്പാണ്ഡെ നന്ദിയും രേഖപ്പെടുത്തി.
​ഐ.എസ്.സി പ്രസിഡന്റ് ഇ.പി. അബ്ദുറഹ്മാൻ, ഐ.സി.ബി.എഫ് പ്രസിഡന്റ് ഷാനവാസ് ബാവ, അഫിലിയേറ്റഡ് സംഘടനഭാരവാഹികൾ , മുതിർന്ന കമ്മ്യൂണിറ്റി നേതാക്കൾ, വാണിജ്യ പ്രമുഖർ, മാധ്യമ പ്രവർത്തകർ തുടങ്ങിയവർ ചടങ്ങിന് സാക്ഷ്യം വഹിച്ചു. ആർ.ജെ. സുദേവ്  അവതാരകനായിരുന്നു.