ദോഹ: ഉപഭോക്താക്കൾക്കായി ആകർഷകമായ പുതിയ ശമ്പള മാറ്റ (Salary Transfer) ക്യാമ്പയിൻ പ്രഖ്യാപിച്ച് ഖത്തർ ഇസ്ലാമിക് ബാങ്ക് (QIB). ബാങ്കിലേക്ക് ശമ്പളം മാറ്റുന്നവർക്കും നിശ്ചിത ക്രെഡിറ്റ് കാർഡുകൾക്കായി അപേക്ഷിക്കുന്നവർക്കും 1,25,000 വരെ അബ്ഷർ (Absher) റിവാർഡ് പോയിന്റുകൾ ലഭിക്കുന്നതാണ് പുതിയ പദ്ധതി. 2026 ജൂൺ 30 വരെയാണ് ഈ ആനുകൂല്യം ലഭ്യമാകുക.
പുതുതായി ശമ്പളം മാറ്റുന്നവർക്കും, കഴിഞ്ഞ ആറ് മാസമായി ബാങ്കിലേക്ക് ശമ്പളം മാറ്റാത്ത നിലവിലെ ഉപഭോക്താക്കൾക്കും ഈ ഓഫർ പ്രയോജനപ്പെടുത്താം.വിസ ഇൻഫിനിറ്റ് (Visa Infinite), മാസ്റ്റർകാർഡ് വേൾഡ് (Mastercard World), വിസ സിഗ്നേച്ചർ (Visa Signature) എന്നീ ക്രെഡിറ്റ് കാർഡുകൾക്ക് അപേക്ഷിക്കുന്നവർക്കാണ് പോയിന്റുകൾ ലഭിക്കുക.ലഭിക്കുന്ന അബ്ഷർ പോയിന്റുകൾ ഉപയോഗിച്ച് ലോകമെമ്പാടുമുള്ള 900-ലധികം എയർലൈനുകളിൽ ടിക്കറ്റ് ബുക്ക് ചെയ്യാനും 4.5 ലക്ഷത്തിലധികം ഹോട്ടലുകളിൽ താമസം ഒരുക്കാനും സാധിക്കും. കൂടാതെ, ഓൺലൈൻ ഷോപ്പിംഗ്, ഊരിദൂ (Ooredoo), വോഡഫോൺ (Vodafone), കഹ്റാമ (Kahramaa) ബില്ലുകൾ അടയ്ക്കുന്നതിനും ഈ പോയിന്റുകൾ ഉപയോഗിക്കാം. ഖത്തർ എയർവേയ്സ് ഏവിയോസ് (Avios), മീര റിവാർഡ്സ് എന്നിവയിലേക്കും ഈ പോയിന്റുകൾ മാറ്റാൻ സാധിക്കും.
ഉപഭോക്താക്കൾക്ക് കൂടുതൽ മൂല്യവത്തായ സേവനങ്ങൾ നൽകാനാണ് ബാങ്ക് ലക്ഷ്യമിടുന്നതെന്ന് ക്യു.ഐ.ബി പേഴ്സണൽ ബാങ്കിങ് ഗ്രൂപ്പ് ജനറൽ മാനേജർ ഡി. ആനന്ദ് പറഞ്ഞു. കൂടുതൽ വിവരങ്ങൾക്ക് ബാങ്കിന്റെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
