​ദോഹ: ഹമദ് അന്താരാഷ്ട്ര വിമാനത്താവളത്തിൽ നിന്ന് (HIA) അൾജീരിയൻ തലസ്ഥാനമായ അൽജിയേഴ്സിലേക്കുള്ള നേരിട്ടുള്ള വിമാന സർവീസുകൾ 'എയർ അൾജീരി' (Air Algerie) പുനരാരംഭിച്ചു. അന്താരാഷ്ട്ര യാത്രാസൗകര്യങ്ങൾ മെച്ചപ്പെടുത്തുന്നതിനും വ്യോമബന്ധം കൂടുതൽ ശക്തമാക്കുന്നതിനും ഈ നീക്കം സഹായകരമാകുമെന്ന് വിമാനത്താവള അധികൃതർ അറിയിച്ചു.  
​മേഖലയിലെ പ്രതികൂല കാലാവസ്ഥയും വ്യോമപാതയിലെ സുരക്ഷാ ആശങ്കകളും മുൻനിർത്തി കഴിഞ്ഞ ഏഴ് മാസത്തോളമായി നിർത്തിവെച്ചിരുന്ന സർവീസുകളാണ് ഇപ്പോൾ പുനരാരംഭിച്ചിരിക്കുന്നത്. എയർ അൾജീരിയുടെ വിമാനം ദോഹയിൽ ഇറങ്ങിയ വിവരം ഹംദ് അന്താരാഷ്ട്ര വിമാനത്താവളം ഔദ്യോഗിക 'എക്സ്' (X) അക്കൗണ്ട് വഴിയാണ് പങ്കുവെച്ചത്. ഇരു രാജ്യങ്ങളിലെയും തലസ്ഥാനങ്ങൾ തമ്മിലുള്ള യാത്രാ ഓപ്ഷനുകൾ വർദ്ധിപ്പിക്കാൻ ഇത് ഉപകരിക്കും.  
​2022 വേനൽക്കാലത്ത് ആഴ്ചയിൽ രണ്ട് സർവീസുകളോടെയാണ് എയർ അൾജീരി ദോഹയിലേക്ക് സർവീസ് ആരംഭിച്ചിരുന്നത്. നിലവിൽ ആഴ്ചയിൽ മൂന്ന് വിമാന സർവീസുകളാണ് ഉള്ളതെങ്കിലും, യാത്രക്കാരുടെ വർദ്ധിച്ചുവരുന്ന ആവശ്യകത കണക്കിലെടുത്ത് ഒക്ടോബർ 25 മുതൽ ഇത് ദിനംപ്രതിയുള്ള (Daily) സർവീസാക്കി മാറ്റാൻ പദ്ധതിയുണ്ട്.  
​എയർ അൾജീരിയുടെ 45-ാമത് അന്താരാഷ്ട്ര ലക്ഷ്യസ്ഥാനമാണ് (Destination) ദോഹ. ഈ എയർലൈൻ കൂടി എത്തിയതോടെ ഖത്തർ എയർവേയ്‌സ് ഉൾപ്പെടെ ഹമദ് വിമാനത്താവളം വഴി സർവീസ് നടത്തുന്ന ആകെ പങ്കാളിത്ത എയർലൈനുകളുടെ എണ്ണം 37 ആയി ഉയർന്നു. നിലവിൽ ലോകമെമ്പാടുമുള്ള 160-ലധികം കേന്ദ്രങ്ങളിലേക്ക് ദോഹയിൽ നിന്ന് നേരിട്ട് വ്യോമബന്ധമുണ്ട്.  
​ഈ സർവീസ് പുനരാരംഭിച്ചത് ഖത്തറും അൾജീരിയയും തമ്മിലുള്ള വിനോദസഞ്ചാര, സാമ്പത്തിക മേഖലകളിലെ സഹകരണത്തിന് വലിയ ഊർജ്ജം പകരുമെന്നാണ് വിലയിരുത്തപ്പെടുന്നത്.